සීසීකඩ විසිරුණු සිතිවිලි එක්තැන් කළ රොක් සංගීතයේ කිරුළු නොපළන් රජු දිවි සැරිය නිමකරයි

මෙරට සංගීත ක්ෂේත්‍රයේ සුප්‍රසිද්ධ ගායන ශිල්පියෙකු සහ අධ්‍යක්ෂවරයෙකු වන සේනක බටගොඩ අභාවප්‍රාප්ත වී තිබෙනවා.

අද (11) අලුයම ඒ මහතා අභාවප්‍රාප්ත වී ඇති බවයි වාර්තා වන්නේ.

අසනීප තත්ත්වයෙන් පසු වූ ඒ මහතා අභාවප්‍රාප්ත වන විට 66 හැවිරිදි වියෙහි පසුවුණා.

වර්ෂ 1958 ජුනි මස 25 වැනි දින උපත ලැබූ සේනක බටගොඩ සූරීන් මෙරට සංගීත ක්ෂේත්‍රයේ ජනප්‍රිය වූයේ රොක්, පොප් ගායන වාදන ශිල්පියෙකු ලෙසයි.

දක්ෂ ගිටාර් වාදකයෙකු වූ ඒ මහතාගේ රසිකයින් අමන්දානන්දයට පත් කළ ගීත ගොන්න අතර; ” අපි කවුරුද, අපි සැනසිල්ලේ, අළු යට ගිනි, රස්තා, හීනවලට පණක් තියෙනවා, සැනසුම සහ හොඳම දේ..” ආදි ගීත ඒ අතර වනවා.

දැවැන්ත රසික ආකර්ෂණයක් හිමි කර ගත්, ඔහු ගැයූ ගීත 7ක් සම්බන්ධයෙන් මෙම වසරේ අප්‍රේල් 03 වන දා වාරණ නියෝගයක් ද නිකුත් කෙරුණා.

කොළඹ මහාධිකරණය විසින් එම වාරණ නියෝගය නිකුත් කළේ, ‘අපි කවුරු ද’, ‘අපි සැනසිල්ලේ’, ‘රස්තා’, ‘අළු යට ගිනි’, ‘හීනවලට පණක් තිබෙනවා’, ‘හොඳ ම දේ’ හා ‘සැනසෙන්නම්’ යන ගීත 7 සම්බන්ධයෙන් වීම ද විශේෂත්වයක්.

සේනක බටගොඩ සූරීන් ගැයූ ගීත අතර ඉහත වාරණයට ලක් වූ ගීත සියල්ලම දෙස් විදෙස් රසිකයින් මහත් ආදරයෙන් වැළඳගත් ගීත අතර වුණා.

කොළඹ වාණිජ මහාධිකරණ විනිසුරු ප්‍රියන්ත ප්‍රනාන්දු මෙම වාරණ නියෝගය නිකුත් කළේ, ජනත් කුලතිලක නමැත්තෙකු විසින් ගොනු කළ නඩුවක් විභාගයට ගනිමින්.

ජනත් කුලතිලක සංගීත නිර්මාණයට දායක වූ බව කියන ගීත 7ක් වෙනුවෙන් බුද්ධිමය දේපළ පනත යටතේ ගෙවිය යුතු කර්තෘ භාගය නොගෙවූ බවට වන චෝදනා යටතේ එම ගීත මින් ඉදිරියට ගායනා කිරීම වළක්වමින් ගායන ශිල්පී සේනක බටගොඩට එරෙහිව එම වාරණ නියෝගය නිකුත් කෙරුණා.

එසේ ම, ජනත් කුලතිලක නමැති පැමිණිලිකරුගේ ලිඛිත අවසරයකින් තොරව එම ගීත 7 වෙනත් පාර්ශ්වයක් වෙත පැවරීම වළක්වමින් ද වාණිජ මහාධිකරණය වාරණයක් නිකුත් කෙරුණේ මෙවන් පසුබිමක් මතයි.

කෙසේවෙතත් මෙවන් ගීත රැසකට වර්ණවත් විනිවිදභාවයකින් යුතු හඬ පෞරුෂයක් එක් කළ සේනක බටගොඩ ගායන ශිල්පියා ගේය පද රචකයෙකු ලෙසට ද ප්‍රසිද්ධියක් උසුලන අතර රාගම රෝහලේ ප්‍රතිකාර ලබමින් සිටියදීයි ඒ මහතා මෙලෙස අභාවප්‍රාප්ත වී ඇත්තේ.