ජනාධිපති අනුර කුමාර දිසානායක හෙට (15) සහ අනිද්දා (16) මන්නාරම සහ යාපනයේ පැවැත්වෙන වැඩසටහන් රැසක් සඳහා සහභාගි වීමට නියමිතයි.
හෙට (15) පස්වරු 2.00ට යාපනය, වේලනෙයි, අයියනාර් කෝවිල් ක්‍රිඩා පිටියේ පැවැත්වෙන උතුරු පළාත් තෛපොංගල් උත්සවය සඳහා සහභාගී වන ජනාධිපතිවරයා, සංචාරක ප්‍රවර්ධනය වෙනුවෙන් යාපනය සංචාරක මණ්ඩලය විසින් මනිපායි මරුතඩි විනායහර් කෝවිලේදී සංවිධානය කර තිබෙන තෛපොංගල් උත්සවය සඳහා ද සහභාගි වීමට නියමිතව තිබෙනවා.
යුද්ධය හේතුවෙන් උතුරු සහ නැගෙනහිර පළාත්වල තවමත් නිවාස අහිමිව සිටින පවුල් 2500ක් ඇතුළුව ‘තමන්ගේම තැනක් – ලස්සන ජිවිතයක්’ තේමාව යටතේ රට පුරා නව නිවාස 31,218ක් ඉදිකිරීමේ වැඩසටහනේ සමාරම්භක උත්සවය ජනාධිපති අනුර කුමාර දිසානායකගේ ප්‍රධානත්වයෙන් අනිද්දා (16) පෙරවරු 9.00ට යාපනය, චාවකච්චේරිය වීරසිංහම් ප්‍රාථමික විදුහල් ක්‍රීඩාංගණයේදී පැවැත් වෙනවා.
එමෙන්ම, විෂ මත්ද්‍රව්‍ය උවදුර තුරන් කිරීම සඳහා වන ‘රටම එකට’ ජාතික මෙහෙයුමේ උතුරු පළාත් වැඩසටහන යාපනය තාක්ෂණ විද්‍යාලයීය ක්‍රීඩා පිටියේදී අනිද්දා (16) පස්වරුවේ ජනාධිපතිවරයාගේ ප්‍රධානත්වයෙන් පැවැත්වෙනු ඇති.
