ජනාධිපති රනිල් වික්රමසිංහ නාරාහේන්පිට පිහිටි ශ්රී ලංකා රාමඤ්ඤ මහා නිකායේ සංඝ මූලස්ථානය වෙත අද (27) පෙරවරුවේ පැමිණ ශ්රී ලංකා රාමඤ්ඤ මහා නිකායේ මහානායක අග්ගමහා පණ්ඩිත අතිපූජ්ය මකුලෑවේ විමල නායක හිමිපාණන් වහන්සේ ප්රමුඛ නිකායික මහා සංඝරත්නය බැහැ දැක ආශිර්වාද ලබා ගත්තා.
සිය මැතිවරණ කටයුතු ආරම්භ කිරීමෙන් පසුව ජනාධිපතිවරයා මෙලෙස රාමඤ්ඤ මහා නිකායේ මහා සංඝරත්නය බැහැ දැක තිබෙනවා.
එම අවස්ථාවට එහි අනුනායක පූජ්ය වලේබොඩ ගුණසිරි ස්වාමීන් වහන්සේ, නියෝජ්ය මහ ලේකම් අකරැල්ලේ ඥානවංස ස්වාමීන් වහන්සේ, නියෝජ්ය මහ ලේකම් පූජ්ය වාද්දුවේ ධම්මවංශ ස්වාමීන් වහන්සේ, නියෝජ්ය අධිකරණ ලේකම් පූජ්ය හාල්පන්විල පාලිත ස්වාමීන් වහන්සේ, කොළඹ ප්රාදේශීය සංඝ සභාවේ සභාපති පූජ්ය සූරියවැව හේමාන්නද ස්වාමීන්වහන්සේ ප්රමුඛ මහා සංඝරත්නය වැඩම කර සිටියා.
මෙහිදී උන්වහන්සේලා සෙත් පිරිත් සජ්ජායනා කර ජනාධිපතිවරයාගේ ඉදිරි කටයුතු වෙනුවෙන් සිය ආශිර්වාදය පළ කර තිබුණා.
එහිදී මහානායක හිමිපාණන් වහන්සේ ප්රමුඛ නිකායික මහා සංඝරත්නය සමඟ කෙටි කථා බහකට එක් වූ ජනාධිපතිවරයා රටේ ආර්ථික ප්රකෘතිමත්භාවය පිළිබඳ මෙන්ම ඉදිරි සැලසුම් පිළිබඳව ද මහා සංඝරත්නය දැනුවත් කර ඇති බවයි වාර්තා වන්නේ.
එමෙන්ම පිරිවෙන් අධ්යාපනය ආශ්රිතව මතුව ඇති ගැටළු, පූජා භූමිවලට අදාළ ඉඩම් ගැටළු පිළිබඳව ද අවධානය යොමු කෙරුණු අතර, උතුරු හා නැගෙනහිර පළාත්වල සංවර්ධනයට අදාළව එහි ද්රවිඩ මන්ත්රීවරුන් සමඟ කළ සාකච්ඡා පිළිබඳව ද ජනාධිපතිවරයා මහා නායක හිමිපාණන් වහන්සේ දැනුවත් කර තිබෙනවා.
