2007 අංක 48 දරන විශේෂ වෙළෙඳ භාණ්ඩ බදු පනතේ දෙවැනි වගන්තිය යටතේ මුදල් අමාත්‍යවරයා වශයෙන් අග්‍රාමාත්‍ය රනිල් වික්‍රමසිංහ වෙත පැවරී ඇති බලතල ප්‍රකාරව භාණ්ඩ කිහිපයක් මත පනවා ඇති විශේෂ වෙළෙඳ භාණ්ඩ බදු විශාල ලෙස ඉහළ දැමීමට ඊයේ සිට පියවර ගෙන තිබුනා.
එසේ වැඩි කරන ලද බදු අතර යෝගට් ආනයනයේදී කිලෝග්‍රෑම් එකකට පනවා තිබූ රුපියල් 1000ක විශේෂ වෙළඳ භාණ්ඩ බද්ද කිලෝග්‍රෑමයට රුපියල් 2000ක් දක්වා ඉහළ දමා තිබේ.ඒසේම සියලුම වර්ගවල චීස් සඳහා කිලෝග්‍රෑමයකට පනවා තිබූ රුපියල් හාරසියයක විශේෂ වෙළඳභාණ්ඩ බද්ද ද රුපියල් 600 දක්වා ඉහළ දමා තිබෙනවා.
දොඩම් ආනයනයේදී කිලෝ ගැරෑමයකට මෙතෙක් පැවති රුපියල් 200 වූ තිබූ විශේෂ වෙළඳ භාණ්ඩ බද්ද රුපියල් 600ක් දක්වා ඉහළ නැංවීමටද මෙම වැඩි කිරීම් වලින් පියවර ගෙන තිබිනි. මිදි සහ ඇපල් ආනයනයේදී පනවා තිබූ විශේෂ වෙළඳ භාණ්ඩ බද්ද ඉහළ දමා ඇත්තේ රුපියල් 300 සිට රුපියල් 600 දක්වාය.
එච්.එස් කේත 369ක භාණ්ඩ ආනයනය සඳහා පනවා තිබූ බලපත්‍ර ක්‍රමය ජූනි පලවනදා සිට ඉවත් කිරීමට මුදල් අමාත්‍යාංශය තීරණය කර ඇත.
එම භාණ්ඩ සඳහා අයකෙරෙන ආනයනික බදු, රේගු බදු සහ අධිභාර සැලකිය යුතු ළෙස ඉහළ දමමින් මෙම තීරණය ගෙන තිබේ.
එසේම ඊයේ සිට ක්‍රියාත්මක වන පරිදි ආනයනික නව විශේෂ භාණ්ඩ බද්දක් යටතේ සියලුම ආනයනයන භාණ්ඩ සඳහා වන බදු 15% සිට 200% දක්වා ඉහළ දැමීමට මුදල් අමාත්‍යාංශය විසින් පියවර ගෙන තිබෙනවා.
බදු ඉහළ දැමීම ඉදිරි මාස 06 ක කාලයක් සඳහා වලංගු වන බවයි මුදල් අමාත්‍යාංශය සඳහන් කර සිටින්නේ.
එසේම තවත් ජනතාවට වැඩියෙන් දැනෙන තීරණයක් ලෙස මෝටර් රථ, යතුරුපැදි සහ ත්‍රිරෝද රථ සඳහා ටයර් සඳහා වන බදු සීයයට 50 කින් ඉහළ දැමීම පෙන්වා දිය හැකියි.
ගෘහස්ථ විදුලි උපකරණ වන වායු සමීකරණ, රෙදි සෝදන යන්ත්‍ර, රයිස් කුකර්, මයික්‍රෝවේව්, ෆ්‍රිජ්, දුරකථන සඳහා වන බදු 100% කින් ඉහළ දමා ඇත.එසේම අනෙකුත් විදුලි උපකරණ සඳහා වන බද්ද 15% කින් ඉහළ දමා තිබේ.
චොකලට් සඳහා බද්ද 200%ක් ඉහළ දමා ඇති අතර එල්.ඊ.ඩී බල්බ සහ සැරසිලි සඳහා වන බද්ද 50% කින් ඉහළ දමා ඇත.
