ත්‍රිකුණාමලය චීන වරාය ධාන්‍යගම ප්‍රදේශයේදී නාවික හමුදාවට අයත් බස් රථයක් අනතුරට ලක්වීමෙන් දෙදෙනෙකු තුවාල ලබා තිබෙනවා.
අද සවස 6ට පමණ අනතුර සිදුවී ඇත්තේ සාම්පූර් කඳවුරට අයත් බස් රථයක් සෙබළුන් රැගෙන චීන වරාය දුම්රිය ස්ථානය වෙත යමින් සිටියදීයි.
අප වාර්තාකරු සඳහන් කළේ බස් රථය ධාන්‍යගම ප්‍රදේශයේදී මාර්ගයෙන් ඉවතට පැන එම ස්ථානයේ තිබූ රූපලාවන්‍ය මධ්‍යස්ථානයකට කඩා වැදී ඇති බවයි.
එම ස්ථානයේ නතර කර තිබූ යතුරුපැදියකට ද අනතුරින් හානි වී තිබෙනවා.
බස් රථය එම ස්ථානයේ තිබූ තාප්පයක ගැටී ඉදිරියට ගමන් කර රූපලාවන්‍ය මධ්‍යස්ථානය තුලට කඩා වැදී ඇතැයි සඳහන්.
අනතුරින් එම බස් රථයේ රියදුරා සහ පා පුවරුවේ ගමන් කළ නාවික හමුදා සාමාජිකයෙකු තුවාල ලබා තිබෙනවා. සිද්ධිය සම්බන්ධයෙන් චීන වරාය පොලිසියයි විමර්ශන සිදු කරන්නේ.
