ඉදිකිරීම් සහ යටිතල පහසුකම් ව්‍යාපෘති සඳහා භාවිත වන උසස් තාක්ෂණික යන්ත්‍රෝපකරණ දේශීයව නිෂ්පාදනය කිරීම දිරිගැන්වීම සඳහා ඇමෙරිකානු ඩොලර් බිලියන 1.2ක දිරිගැන්වීම් සැලැස්මක් අනුමත කිරීමට ඉන්දීය රජය සූදානම් වෙමින් සිටින බව රොයිටර් පුවත් සේවය වාර්තා කරනවා.
මෙම වැඩසටහන මගින් ඉදිරි වසර හත තුළ දේශීය නිෂ්පාදකයන්ට මූල්‍ය දිරිගැන්වීම් ලබා දෙමින් ඩොලර් බිලියන 1.8ක නව ආයෝජන ආකර්ෂණය කර ගැනීම ඉලක්ක කර තිබෙනවා.
නිෂ්පාදනය කිරීමට සැලසුම් කර ඇති යන්ත්‍ර වනුයේ, උමං මාර්ග කැණීම සඳහා භාවිත වන ටනල් බෝරින් යන්ත්‍ර (Tunnel Boring Machines – TBMs), ගිනි නිවීමේ උසස් උපකරණ, බහු මහල් ගොඩනැගිලි සඳහා භාවිත වන ලිෆ්ට් පද්ධති, අනෙකුත් යටිතල පහසුකම් ඉදිකිරීම් යන්ත්‍රෝපකරණ ආදියයි.
ඉන්දියාව මේ වන විට TBM යන්ත්‍ර සඳහා විශාල වශයෙන් චීනය මත යැපෙන අතර, මෙට්‍රෝ දුම්රිය, අධිවේගී මාර්ග සහ උමං මාර්ග ව්‍යාපෘතිවල භාවිත වන යන්ත්‍ර බොහොමයක් චීනයෙන් ආනයනය කරනවා.
2020 ඉන්දු-චීන දේශසීමා ගැටුමෙන් පසු නවදිල්ලිය චීන ආයෝජන සහ රජයේ ප්‍රසම්පාදන සඳහා සීමා පැනවනු ලැබුවා.
2024 වසරේ චීනය ඉන්දියාවට TBM යන්ත්‍ර අපනයනය ප්‍රමාද කිරීමත් සමඟ මෙම යන්ත්‍රවල සැපයුම සැලකිය යුතු ලෙස පහත වැටී තිබෙනවා.
ඒ අනුව ඉන්දියාව දේශීය නිෂ්පාදන ධාරිතාව ඉහළ නංවා චීනයෙන් ආනයන මත පවතින යැපීම අඩු කිරීම මෙම වැඩසටහනේ ප්‍රධාන අරමුණ බව රජයේ ආරංචි මාර්ග සඳහන් කරනවා.
මෙම දිරිගැන්වීම් වැඩසටහනෙන් රජයේ BEML සමාගමට මෙන්ම Larsen & Toubro සහ Johnson Lifts ඇතුළු ඉන්දීය යන්ත්‍රෝපකරණ නිෂ්පාදන සමාගම් රැසකට ප්‍රතිලාභ හිමිවනු ඇතැයි අපේක්ෂා කෙරෙනවා.
ඉන්දියාවේ ඉදිකිරීම් සහ යටිතල පහසුකම් උපකරණ වෙළෙඳපොළේ වටිනාකම මේ වන විට ඉන්දීය රුපියල් ට්‍රිලියන 1ක් පමණ වන අතර, මාර්ග, මෙට්‍රෝ, ගුවන් තොටුපොළ සහ අනෙකුත් යටිතල පහසුකම් ව්‍යාපෘති වේගවත් කිරීමත් සමඟ එය තවදුරටත් පුළුල් වනු ඇතැයි අපේක්ෂා කෙරෙනවා.
