ශ්‍රී ලංකා කාන්තා ක්‍රිකට් කණ්ඩායමේ නායිකා චමරි අතපත්තු සිය 11 වැනි අර්ධ ශතකය මීට ටික වේලාවකට පෙර රැස් කරගත්තා.
ඒ ආසියානු කුසලානයේ මේ වනවිට මැලේසියාවට එරෙහිව දඹුල්ලේ දී පැවැත්වෙන තරගයට එක්වෙමින්.
අද තරගයේ කාසියේ වාසිය දිනූ නායිකා චමරි තීරණය කළේ පළමු ව පන්දුවට පහරදීමටයි.
ඒ අනුව ශ්‍රී ලංකා කණ්ඩායමේ ආරම්භක පිතිකාරිණියන් ලෙස පිටියට පැමිණියේ නායිකා චමරි අතපත්තු සමගින් විශ්මි ගුණරත්නයි.
පළමු කඩුල්ලට ශක්තිමත් ලකුණු සබඳතාවක් ගොඩනැගීමට චමරිට හා විශ්මිට නොහැකි වූ අතර; ඊට හේතුව වූයේ විශ්මි එක් ලකුණකට Suabika Manivannanගේ පන්දුවක් හමුවේ දැවී යාමට ලක් වීමයි.
කෙසේවෙතත් දෙවැනි කඩුල්ලට චමරි හර්ෂිතා සමරවික්‍රම සමග එක් ව පන්දු 51කට ලකුණු 64ක් රැස් කළා.
හර්ෂිතා Mahirah Izzati Ismailගේ පන්දුවකට ලකුණු 26ක් ලබා සිටියදී දැවී ගියා.
නායිකා චමරි සමගින් මේ වනවිට 03 වැනි කඩුල්ලට අනුෂ්කා සංජීවනී පිටියේ රැඳී සිටින අතර; ශ්‍රී ලංකා කණ්ඩායම පන්දුවාර 14ක් අවසානයේ දී කඩුලු 02ක් දැවී ලකුණු 120ක් ලබා සිටිනවා.
චමරි නොදැවී පන්දු 54කට ලකුණු 73ක් රැස් කරගෙන සිටින්නේ හතරේ පහර 11ක් සහ හයේ පහර 02ක් ද සමගින්.
