මුදලට තරග පාවාදීම සඳහා යෝජනා කළේ යැයි කියන සිද්ධියක් සම්බන්ධයෙන් ලංකා T10 සුපර් ලීග් ක්‍රිකට් තරගාවලියේ ගෝල් මාවලර්ස් (GALLE MARVELS) කණ්ඩායමේ හිමිකරු වන ඉන්දීය ජාතිකයෙකු ක්‍රීඩා වැරදි වැළැක්වීමේ විශේෂ පොලිස් ඒකකය විසින් අත්අඩංගුවට ගෙන තිබෙනවා.
ඔහු අද (13) උදෑසන සුගතදාස ගෘහස්ථ ක්‍රීඩා පිටියේ ස්ථාපිත ක්‍රීඩා වැරදි වැළැක්වීමේ පොලිස් ඒකකය වෙත රැගෙන ආවා.
පසුව පැය කිහිපයක් ප්‍රකාශ සටහන් කර ගැනීමෙන් අනතුරුව උදෑසන 10.30ට පමණ එම ස්ථානයෙන් කොළඹ ප්‍රධාන මහේස්ත්‍රාත් අධිකරණය වෙත ඉදිරිපත් කිරීමට රැගෙන ගියා.
ලංකා T10 සුපර් ලීග් ක්‍රිකට් තරගාවලිය සඳහා සහභාගී වී සිටින බටහිර ඉන්දීය කොදෙව් ක්‍රීඩකයෙකුට මුදලට තරග පාවාදීම සඳහා අදාළ සැකකාර පුද්ගලයා විසින් යෝජනා කර ඇති බවයි වාර්තා වෙන්නේ.
ඒ සම්බන්ධයෙන් අන්තර්ජාතික ක්‍රිකට් කවුන්සිලය විසින් මෙරට ක්‍රීඩා වැරදි වැළැක්වීමේ විශේෂ පොලිස් ඒකකයට පැමිණිලි කර තිබුණා.
ඒ අනුව පෙරේදා (11) එම ඒකකයේ කණ්ඩායමක් පල්ලේකැලේ ප්‍රදේශයට ගොස් මහනුවර ප්‍රදේශයේ දී සැකකරුව අත්අඩංගුවට ගනු ලැබුවා.
ලංකා පන්දුවාර 10 ක්‍රිකට් තරගාවලිය ශ්‍රී ලංකා ක්‍රිකට් ආයතනයේ මැදිහත් වීමෙන් පැවැත්වෙන අතර එහි සමාරම්භය පෙරේදා (11) පස්වරුවේ මහනුවර පල්ලෙකැලේ දී සිදුවුණා.
මෙම තරගාවලියට දේශීය ක්‍රීඩකයින් මෙන් ම විදේශීය ක්‍රීඩකයින් ද එක් ව සිටින අතර කණ්ඩායම සයක් තරග වදිනවා.
