ඉන්දියාවේ මුම්බායි නුවර සිට කටුනායක ගුවන් තොටුපොළ වෙත පැමිණි ගුවන් යානයක ගමන් ගත් ගුවන් මගියෙකු, එම ගුවන් යානය තුළ සිටි මගීන්ට සහ ගුවන් සේවිකාවන්ට ලිංගික අඩත්තේට්ටම් කිරීම නිසා ගුවන් තොටුපොළ පොලීසිය අද (12) අලුයම අත් අඩංගුවට ගැනුණා.
මෙලෙස අත්අඩංගුවට ගෙන ඇත්තේ යාපනය – නාගද්වීපය යන ප්රදේශයේ පදිංචි කන්දයියා තුරේසිංහම් 65 හැවිරිදි අයෙක්.
ඔහු ස්වීඩනයේ ද පදිංචි ද්විත්ව පුරවැසිභාවය හිමි අයෙකු ලෙස ද වාර්තා වනවා.
සැකකරු අද අලුයම 12.45 ට ඉන්දියාවේ මුම්බායි නුවර සිට ශ්රී ලන්කන් ගුවන් සේවයේ යූ.එල්.- 144 දරන ගුවන් යානයෙන් කටුනායක ගුවන් තොටුපොළ වෙත පැමිණෙමින් සිටියදී, අධික ලෙස මත්පැන් පානය කර තිබෙන බවයි වාර්තා වන්නේ.
ඉන් අනතුරුව එම ගුවන් යානය තුළ සිටි මගීන්ට කරදර වන ආකාරයට හැසිරීමට පටන් ගෙන ඇති අතර පසුව එම යානය තුළ සේවය කළ ගුවන් සේවිකාවන් දෙදෙනෙකු වෙත ලිංගික අඩත්තේට්ටම් කිරීමට ද හෙතෙම තැත් කර තිබෙනවා.
පසුව ගුවන් යානයේ ආරක්ෂක නිලධාරීන් ඔහු අල්ලාගෙන, මෙම සිදුවීම පිළිබඳ වගුවන් නියමුවා දැනුවත් කිරීමට ද පියවර ගැනුණා.
ඒ අනුව මේ පිළිබඳ ව ගුවන් නියමුවා විසින් කටුනායක ගුවන් තොටුපොළ දැනුවත් කිරීමටයි කටයුතු කර ඇත්තේ.
මෙම ගුවන් යානය කටුනායක ගුවන් තොටුපොළ වෙත ගොඩ බැස්ස වූ පසුව, ශ්රී ලන්කන් ගුවන් සේවයේ ආරක්ෂක නිලධාරීන්, ගුවන් තොටුපොළ පොලීසිය සමග පැමිණ මෙම ගුවන් මගියා අත්අඩංගුවට ගෙන තිබෙනවා.
සැකකාර ගුවන් මගියා පොලීසිය විසින් වෛද්ය පරීක්ෂණයක් සඳහා ද යොමු කර තිබූ අතර, එහිදී මොහු මත්පැන් පානය කර ඇති බවට සනාථ වී තිබෙනවා.
සැකකරු අද දින කොළඹ ප්රධාන මහේස්ත්රාත් අංක 01 අධිකරණය වෙත ඉදිරිපත් කිරිමට නියමිතයි.
