පුද්ගලයන් 38 දෙනෙකුට මරු කැඳවමින් නත්තල් දිනයේ සිදුවූ ගුවන් අනතුරේ වරද පිළිගන්නා ලෙස අසර්බයිජාන් ජනාධිපති ඉල්හාම් අලියෙව් රුසියාවෙන් ඉල්ලා තිබෙනවා.
එලෙස වරද පිළිගෙන අනතුර සම්බන්ධයෙන් වන්දි ගෙවන ලෙසයි අසර්බයිජාන් ජනාධිපතිවරයා රුසියාවට පවසා ඇත්තේ.
පසුගිය බදාදා අසර්බයිජාන ගුවන් සේවයට අයත් මගී ගුවන් යානයක් කසක්ස්තානයේ දී අනතුරට ලක් වීමෙන් යානයේ සිටි 67 දෙනාගෙන් පුද්ගලයින් 38 දෙනෙකු මිය ගියා.
පසුව අනාවරණය වුණේ රුසියාව විසින් එල්ල කළ ගුවන් ආරක්ෂක මිසයිල ප්‍රහාරයක් හේතුවෙන් යානය කඩා වැටුණු බවයි.
මේ අතර පසුගිය සෙනසුරාදා, රුසියානු ජනාධිපති ව්ලැඩිමීර් පුටින්, රුසියානු ගුවන් සීමාවේදී ගුවන් යානය බිම හෙළීම සම්බන්ධයෙන් අසර්බයිජානියානු ජනාධිපතිවරයාගෙන් සමාව අයැද සිටියා.
පුටින්ගේ සමාව අයැදීම පිළිගනිමින් අසර්බයිජාන් ජනාධිපතිවරයා කියා සිටියේ රුසියාව ඔවුන්ගේ වරද පිළිගෙන වන්දි ගෙවිය යුතු බවයි.
අසර්බයිජාන් ගුවන් සේවයට අයත් යානය දෙසැම්බර් 25 වැනි දින අසර්බයිජානයේ අගනුවර වන බකු සිට චෙචන් අගනුවර වන ග්‍රොස්නි දක්වා ගමන් කරමින් තිබිය දී මෙලෙස අනතුරට ලක්ව තිබුණා.
