ගුරු වෘත්තිය සමිති සහ අධ්‍යාපන අමාත්‍ය අග්‍රාමාත්‍ය හරිනි අමරසූරිය අතර හමුවක් අධ්‍යාපන අමාත්‍යංශයේ දී අද (22) පැවැත් වුණා.
නව අධ්‍යාපන ප්‍රතිසංස්කරණ ක්‍රියාවලිය ඇතුළු කරුණු කිහිපයක් සම්බන්ධයෙන් ගුරු වෘත්තිය සංගම් අග්‍රාමාත්‍යවරිය සමඟ මෙහිදී සාකච්ඡා කර තිබෙනවා.
මෙතෙක් කලක්, පස්වරු 2.00 දක්වා පාසල් කාලය දීර්ඝ කිරීම සම්බන්ධයෙන් එකම ස්ථාවරයක සිටි අග්‍රාමාත්‍යවරිය අද පැවති සාකච්ඡාවේ දී යම් මට්ටමකට තමන්ගේ ප්‍රකාශවලට ඇහුම්කන්දීමක් සිදුකළ බවයි ගුරු වෘත්තිය සංගම් මාධ්‍ය වෙත අදහස් දක්වමින් පැවසුවේ.
පාසල් කාලසීමාව පස්වරු 2.00 දක්වා දීර්ඝ නොකිරීමේ ගුරු වෘත්තිය සංගම්වල ඉල්ලීම පිළිබඳව අධ්‍යාපන බලධාරීන් විසින් යළි සලකා බලා එම තීරණය කඩිනමින් දැනුම්දීමට එකඟ වූ බව ද ගුරු වෘත්තිය සංගම් වැඩිදුරටත් සඳහන් කළා.
ජනවාරි මස පස් වැනි දිනට පෙර ඊට සාධනීය ප්‍රතිචාරයක් නොලැබුන හොත් අනිවාර්යයෙන් වෘත්තිය ක්‍රියාමාර්ගයකට යොමුවන බවයි එම සංගම් මෙහිදී අනතුරු අඟවා සිටියේ.
