ගාල්ල, බද්දේගම ප්රදේශයේ පදිංචි 54 හැවිරිදි පුද්ගලයෙක් තම පාදවල ඇති වූ තුවාල ආසදනය වීම නිසා පසු ගිය දා බද්දේගම රෝහලට පැමිණ තිබෙනවා.
දින තුනක් පමණ අදාළ රෝගියා බද්දේගම රෝහලේ නේවාසිකව ප්රතිකාර ලබා ඇති අතර පසුගිය 30 වැනිදා රාත්රියේ ඔහුගේ තත්ත්වය ආසධ්ය වීම නිසා කරාපිටිය ජාතික රෝහල වෙත මාරුකර යැවීමට කටයුතු කර ඇති බවට වාර්තාවනවා.
ගිලන් රථයක් මඟින් අදාළ රෝගියා කරාපිටිය ජාතික රෝහල වෙතට රැගෙන යන අතරතුර මීපාවල ප්රදේශයේ දී ගිලන් රථයේ පසුපස දොර විවර වී රෝගියා මාර්ගයට ඇඳ වැටී ඇති අතර ඒ පිළිබද නොදැන රියැදුර විසින් ගිලන් රථය ඉදිරියට ධාවනය කර ඇති බවයි පැවසෙන්නේ.
පසුපසින් යතුරුපැදියක පැමිණි පුද්ගලයෙක් විසින් රියදුරුව දැනුවත් කිරීමෙන් අනතුරුව රියදුරු ගිලන් රථය නතර කිරීමෙන් පසු පිටුපස සිටි සාත්තු සේවකයා වැටී සිටි රෝගියා දෙසට දිව ගොස් ඇති අතර ගිලන් රථය ද පසුපසට ධාවනයක් කර රෝගියාව නැවත ඊට දමාගෙන කරාපිටිය ජාතික රෝහල වෙතට ගෙනගොස් තිබුණා.
නමුත් අදාළ රෝගියා රථයෙන් වැටුණු බව කරාපිටිය රෝහලේ කාර්ය මණ්ඩලයට ඔවුන් විසින් දැනුවත් කර නොමැති බවයි වාර්තා වන්නේ.
රෝගියාගේ තත්ත්වය බරපතල වූ නිසා ඔහු දැඩි සත්කාර ඒකකයට ඇතුළත් කර ඔහුට ශල්යකර්මයක්ද සිදුකළ බව රෝහල් ආරංචි මාර්ග සඳහන් කළා.
ශල්යකර්මය සිදුකළ ද අදාළ රෝගියා පසුව ජීවිතක්ෂයට පත්ව තිබෙනවා.
කෙසේ වෙතත් අදාළ පුද්ගලයාගේ පවුලේ සාමාජිකයන්ද ගිලන් රථයෙන් ඇඳ වැටීම පිළිබද නොදැනුවත් අතර මුහුණුපොත ඔස්සේ අදාළ සිදුවීම සංසරණය වීමත් සමඟ ඒ පිළිබද සොයාබලා බද්දේගම පොලිසියාවෙත පැමිණිල්ලක් ඉදිරිපත් කර තිබෙනවා.
බද්දේගම පොලිසිය විසින් තම පොලිස් වසමට අදාළ නොවන බව පවසමින් එම පැමිණිල්ල භාරගෙන නොමැති අතර පොද්දල පොලිසිය වෙතට පැමිණිල්ල ඉදිරිපත් කරන ලෙසයි දැනුම් දී ඇත්තේ.
පොද්දල පොලිසිය වෙතට ද පැමිණිලි කර තිබුණ ද එම පොලිසිය විසින් ද පැමිණිල්ල භාර ගැනීම ප්රතික්ෂේප කළ බවයි ඔවුන් පවසා සිටියේ.
සිද්ධියට අදාළව CCTV දර්ශනද තිබෙන අතර පවුලේ සාමාජිකයන් ඉල්ලා සිටින්නේ මෙම සිද්ධිය සම්බන්ධයෙන් විධිමත් පරීක්ෂණයක් සිදුකර ,මියගිය පුද්ගලයාට සාධාරණයක් ඉටු කරන ලෙසයි.
