ගිනි අවි පෙන්වා ඌරුබොක්ක හීනටිගොඩ ප්‍රදේශයේ නිවසක සිටි පුද්ගලයන් බිය ගන්වා මුදල් සහ දේපළ කොල්ලකෑමේ සිද්ධියට සම්බන්ධ ප්‍රධාන සැකකරු පොලිස් අත්අඩංගුවට ගෙන තිබෙනවා.
පසුගිය 11 වනදා පැමිණි පිරිසක් ගිනි අවි පෙන්වා නිවැසියන් බිය ගන්වා අයුතු ලෙස සිරකර මුදල් සහ දේපළ කොල්ලකෑමේ සිද්ධිය සම්බන්ධයෙන් ඌරුබොක්ක පොලිසිය විශේෂ විමර්ශනයක් ආරම්භ කර තිබුණා.
ඒ අනුව සිද්ධිය සම්බන්ධයෙන් සැකකරුවන් තුන්දෙනෙකු සහ එක් සැකකාරියක් අපරාධයට පැමිණි මෝටර් රථය, සොරකම් කළ මුදල් සහ රන් භාණ්ඩ සමග මීට පෙර අත්අඩංගුවට ගනු ලැබුවා.
වැඩිදුරටත් සිදු කරන ලද විමර්ශණයේදීයි මෙම අපරාධය මෙහෙයවූ ප්‍රධාන සැකකරු ඊයේ (15) කොලොන්න ප්‍රදේශයේදී අත්අඩංගුවට ගෙන ඇත්තේ.
එම පුද්ගලයාගෙන් සිදු කළ ප්‍රශ්න කිරීමේදී අපරාධයට භාවිත කළ මෙරට නිශ්පාදිත ගිනි අවියක්, බෝර 12 පතුරම්, කොල්ලකන ලද මුදල් රුපියල් 250000ක්, කොල්ලකෑ මුදල්වලින් ලබාගත් ජංගම දුරකථන 2ක් සහ රන් මාලයක් සොයාගෙන තිබෙනවා.
මෙම සැකකරුට ගාල්ල සහ ඇඹිලිපිටිය මහේස්ත්‍රාත් අධිකරණ මගින් වරෙන්තු 4ක් ද නිකුත් කර ඇති බවයි පොලිසිය සඳහන් කළේ.
54 හැවිරිදි සැකකරු ඕමල්පේ ප්‍රදේශයේ පදිංචිකරුවෙක්.
ඔහු අද මොරවක මහේස්ත්‍රාත් අධිකරණයට ඉදිරිපත් කිරීමට නියමිත අතර ඌරුබොක්ක පොලිසිය වැඩිදුර විමර්ශන සිදු කරනවා.
