ආසියාන්-ඉන්දියා සබඳතා: දීර්ඝකාලීන සහයෝගීතාව තවදුරටත් ශක්තිමත් කිරීමට ඉන්දියාවේ කැපවීම නැවත තහවුරු කෙරේ
ගිනිකොනදිග ආසියාතික රටවල සංගමය (ASEAN) සහ ඉන්දියාව අතර පවතින දීර්ඝකාලීන උපායමාර්ගික සහයෝගීතාව තවදුරටත් පුළුල් කිරීමටත්, කලාපීය ස්ථාවරත්වය වෙනුවෙන් එකිනෙකා අතර පවතින සබඳතා ශක්තිමත් කිරීමටත් දෙපාර්ශවයම නැවත වරක් සිය කැපවීම තහවුරු කර තිබෙනවා.
මෙම තීරණයට එළැඹ ඇත්තේ පිලිපීනයේ පැවැත්වෙන ආසියාන් සංවිධානයේ රටවල විදේශ අමාත්යවරුන්ගේ රැස්වීමට සමගාමීව ඉන්දියාව සමග පැවැති නිල සාකච්ඡා වටයකදීයි.
මෙම සාකච්ඡාවලදී ප්රධාන වශයෙන් ක්ෂේත්ර කිහිපයක් කෙරෙහි අවධානය යොමු කර තිබේ. ඒ අතර වෙළඳ සහ ආර්ථික සහයෝගීතාව නංවාලීම, සාගර ආරක්ෂාව තහවුරු කිරීම, ඩිජිටල් තාක්ෂණය සහ සයිබර් ආරක්ෂාව සම්බන්ධයෙන් එක්ව කටයුතු කිරීම මෙන්ම ජනතාව අතර සබඳතා වර්ධනය කිරීම ප්රධාන වනවා.
ආසියාන් කලාපය තුළ වෙළඳ බාධා ඉවත් කරමින්, නිදහස් වෙළඳ ගිවිසුම් යාවත්කාලීන කිරීම සහ සැපයුම් දාමයන්හි විශ්වාසනීයත්වය තහවුරු කිරීම කෙරෙහි ද මෙහිදී අවධානය යොමුව තිබෙනවා.
ඉන්දියාවේ ‘Act East’ ප්රතිපත්තිය සහ ඉන්දු-පැසිෆික් කලාපය පිළිබඳ ආසියාන් සංකල්පය පෙරදැරි කරගනිමින්, නිදහස්, විවෘත සහ නීතිය මත පදනම් වූ ඉන්දු-පැසිෆික් කලාපයක් පවත්වාගෙන යාමේ වැදගත්කම දෙපාර්ශවයම මෙහිදී පෙන්වා දී තිබෙනවා.
කලාපීය භූ-දේශපාලනික අභියෝග, ත්රස්තවාදයට එරෙහි සටන සහ දේශගුණික විපර්යාස හමුවේ ඔරොත්තු දීමේ හැකියාව වර්ධනය කරගැනීම සඳහා ඉදිරියටත් සමීපව කටයුතු කිරීමට දෙපාර්ශවයම එකඟතාව පළ කර තිබෙනවා.
