ගාල්ල සිට නාවික සැතපුම් 241 ක් පමණ (කිලෝමීටර් 501) ගැඹුරු මුහුදේ දී අනතුරට පත් “නිහතමානි 01” බහුදින ධීවර යාත්‍රාවේ සිටි, ධීවරයින් සිව්දෙනා ඊයේ (04) දින ශ්‍රී ලංකා නාවික හමුදාවේ මැදිහත් වීමෙන් ගොඩබිමට ගෙන ප්‍රතිකාර සඳහා කරාපිටිය ශික්ෂණ රෝහල වෙත යොමු කර තිබෙනවා.
නාවික හමුදා මාධ්‍ය අංශය නිවේදනය කළේ; මෙම ධීවර යාත්‍රාව අනතුරට පත්වීමෙන් පසුව ඒ අසල ධීවර කටයුතුවල නිරත වූ “ලසන්ත 01” බහුදින ධීවර යාත්‍රාව විසින් මුදාගෙන ඇති බවයි.
ඊයේ පස්වරුවේ මෙම ධීවරයින් සිව්දෙනා ගාල්ල වරාය වෙත රැගෙන ඒමෙන් පසුවයි රෝහල්ගත කර ඇත්තේ.
ධීවර හා ජලජ සම්පත් දෙපාර්තමේන්තුව විසින් නාවික හමුදා මූලස්ථානයේ පිහිටි කොළඹ සමුද්‍රීය සෙවීම් හා මුදා ගැනීම් සම්බන්ධීකරණ මධ්‍යස්ථානය වෙත පෙරේදා (03) දින සිදුකළ දැනුම්දීකට අනුව ගැඹුරු මුහුදේ දී අනතුරට පත් බහුදින ධීවර යාත්‍රාවෙන් ධීවරයින් සිව්දෙනෙකු කඩිනමින් ගොඩබිමට රැගෙන ඒම සඳහා ශ්‍රී ලංකා නාවික නෞකා ගජබාහු නෞකාව එම මුහුදු ප්‍රදේශය වෙත පිටත්කර යැවීමට කටයුතු කෙරුණා.
ශ්‍රී ලංකා නාවික නෞකා ගජබාහු නෞකාව වෙත ‘ලසන්ත 01’ නෞකාවෙන් බේරාගනු ලැබූ ධීවරයින් සිව්දෙනාව ලබාගැනීමෙන් අනතුරුව, ගජබාහු නෞකාව තුළ දී නාවික හමුදා වෛද්‍ය කණ්ඩායමක් මගින් ප්‍රතිකාර ලබාදෙමින් ගාල්ල වරාය වෙත රැගෙනවිත්, තිබෙනවා.
