නුවරඑළිය ග්රෙගරි වැවේ සංචාරකයන් රැගත් බෝට්ටු දෙකක් ගැටී, පෙරලීමෙන් ඊයේ (19) සිදුවූ අනතුරින් පසු එම බෝට්ටු සේවාව නියාමනයක් ඇතිව පවත්වාගෙන යෑමට අද (20) සිට පියවර ගන්නා බව නුවරඑළිය නගරාධිපති උපාලි වනිගසේකර පවසනවා.
ග්රෙගරි වැවේ සංචාරක බෝට්ටු 120ක් පමණ ඇති බවත්, ඊයේ (19) සිදු වූ අනතුරින් පසු එම බෝට්ටු හිමිකරුවන් සහ ක්රියාකරුවන් කැඳවා සංචාරකයින්ට ආරක්ෂිත කබා පළඳවා, වේග සීමාවන් අඩුකර, අවදානම් රහිත විනයක් සහිතව බෝට්ටු සවාරි රැගෙන යෑම සිදුකරන ලෙසට උපදෙස් ලබාදුන් බවයි නගරාධිපතිවරයා පැවසුවේ.
ඊයේ (19) පස්වරුවේ ග්රෙගරි වැවේ සංචාරකයන් දෙදෙනෙකු රැගෙන ගිය බෝට්ටුවක් ඉදිරියට අධික වේගයෙන් පැමිණි තවත් බෝට්ටුවක් ගැටී සංචාරකයන් දෙදෙනෙකු රැගෙන ගිය බෝට්ටුව පෙරලී අනතුරක් සිදුව තිබුණා.
එම අවස්ථාවේ දී සංචාරකයින් දෙදෙනා සහ බෝට්ටු ක්රියාකරු නිරුපද්රිතව බේරාගැනීමට හැකිව තිබෙනවා.
අනතුරුව නුවරඑළිය පොලිසිය විසින් බෝට්ටුපැදිකරුවන් දෙදෙනාව සැක පිට අත්අඩංගුවට ගෙන ඇපමත මුදාහැරීමට කටයුතු කර ඇති අතර, ඔවුන්ට එරෙහිව නුවරඑළිය මහේස්ත්රාත් අධිකරණය හමුවේ නෛතික පියවර ගැනීමට කටයුතු කරන බවයි පොලිසිය සඳහන් කළේ.
මේ අතර අනතුර සිදුවූ අවස්ථාවේ බෝට්ටුවේ සිටි සංචාරකයන් දෙදෙනාගේ ජංගම දුරකථන ග්රෙගරිවැවට වැටී අතුරුදහන්ව ඇති අතර, ඒ අනුව සිදු වූ අලාභය බෝට්ටු අයිතිකරුවන් විසින් එම සංචාරකයින් දෙදෙනාට ගෙවීමට කටයුතු කර තිබෙනවා.
