ඊයේ (25) පස්වරුවේ ග්‍රෑන්ඩ්පාස් පොලිස් වසමේ වදුල්ලවත්ත පුරදර සෙවණ මහල් නිවාස සංකීර්ණය ඉදිරිපිට සිදු වූ වෙඩි තැබීමෙන් බරපතළ තුවාල ලැබූ කාන්තාව ද ජීවිතක්ෂයට පත් ව තිබෙනවා.
පොලිස් මාධ්‍ය ප්‍රකාශක කාර්‍යාලය සඳහන් කළේ; අද (26) අලුයම මෙම කාන්තාව ජීවිතක්ෂයට පත් වූ බව කොළඹ ජාතික රෝහල දැනුම්දුන් බවයි.
මෙම වෙඩි තැබීම එල්ල වූයේ ත්‍රීරෝද රථයක් ඉලක්ක කරගෙන වන අතර; වෙඩි තැබූ අවස්ථාවේ දී එහි රැඳී සිටියේ එම රථයේ රියදුරු සහ තවත් කාන්තාවක් පමණි.
එම වෙඩි තැබීමෙන් ත්‍රීරෝද රථ රියදුරු සහ කාන්තාව එම අවස්ථාවේ දී ම රෝහල්ගත කෙරුණ ද රියදුරු ඊයේ රාත්‍රියේ ම ජීවිතක්ෂයට පත් වුණා.
මෙලෙස මියගොස් ඇත්තේ 31 හැවිරිදි කඹුරුගමුව – මාතර ප්‍රදේශයේ පදිංචිකරුවෙක් වන අතර මියගිය කන්තාව 56 හැවිරිදි ඔරොගොඩවත්ත ප්‍රදේශයේ පදිංචිකාරිණියක්.
ඝාතනය සිදු කළ සැකකරුවන් සම්බන්ධයෙන් මෙතෙක් කිසිදු තොරතුරක් හෝ ඝාතනය කුමක් හේතුවෙන් සිදු වූවා ද යන්න පිළිබඳ ව මෙතෙක් නිල වශයෙන් හෙළි වී නැහැ.
කෙසේවෙතත් සිද්ධිය සම්බන්ධයෙන් ග්‍රෑන්ඩ්පාස් පොලිස් විමර්ශන ක්‍රියාත්මකයි.
