මහනුවර තිලක් රත්නායක මාවතේ දැවැන්ත ගස් දෙකක් කඩා වැටීම හේතුවෙන් එම ස්ථානයේ ගාල් කර තිබූ රථ වාහන රැසකට දැඩි අලාභ හානි සිදුව තිබෙනවා.
අද පෙරවරු 11ට පමණ එකිනෙකට යාව පිහිටි බෝ ගසක් සහ සපු ගසක් කඩා වැටී ඇති අතර පැවති අධික වර්ෂාව හේතුවෙන් මෙම ගස්වල මුල් දිරා ගොස් ඇති බවයි ප්‍රදේශවාසීන් සඳහන් කළේ.
ගස් කඩා වැටීමෙන් එම ස්ථානයේ නවතා තිබූ ලොරි, මෝටර් රථ, වෑන්, ත්‍රී රෝද රථ ඇතුළු වාහන 8කට දැඩි අලාභ හානි සිදුව ඇති බව අප වාර්තාකරු සඳහන් කළා.
අනතුරින් තුවාල ලද දෙදෙනෙකු මහනුවර ජාතික රෝහලට ඇතුළත් කර තිබෙනවා.
මහනුවර මූලස්ථාන පොලිසිය, නාගරික ගිනි නිවන ඒකකය, යුද හමුදාව සහ නගර සභාව එක්ව කඩා වැටුණු ගස් ඉවත් කිරීමේ කටයුතු සිදු කළ අතර ඒ හේතුවෙන් මාර්ගයේ රථ වාහන ධාවන කටයුතු පැය කීපයක් අත්හිටුවා තිබූ බව සඳහන්.
