සිංහල දෙමළ අලුත් අවුරුද්දට ගම්බිම් බලා යන ජනතාවගේ ගමන් පහසුව වෙනුවෙන් අද (12) දිනයේත් විශේෂ බස් රථ සහ දුම්රිය සේවා ක්‍රියාත්මක කර ඇති බව ප්‍රවාහන අමාත්‍යංශය සඳහන් කරනවා.
මගී අවශ්‍යතාවය අනුව අතිරේක බස් රථ යෙදවීමට ද ඒ අනුව උපදෙස් ලබාදී ඇති බවයි එම අමාත්‍යංශය පැවසුවේ.
අධිවේගී මාර්ගයේ ගමන් ගන්නා මගීන් වෙනුවෙන් ද මාකුඹුර බහුවිධ ප්‍රවාහන මධ්‍යස්ථානයේ සිට විශේෂ බස් රථ ධාවනය කිරීමට ද සැලසුම් කර තිබෙනවා.
මේ අතර ඊයේ (11) දිනයේත් ගම්බිම් බලා යෑමට මගීන් විශාල පිරිසක් කොටුව මධ්‍යම බස් නැවතුම, බැස්ටියන් මාවතේ පෞද්ගලික බස් නැවතුම, මාකුඹුර බහුවිධ ප්‍රවාහන මධ්‍යස්ථානයට සහ කොළඹ කොටුව දුම්රිය ස්ථානය වෙත පැමිණි සිටියා.
