ශ්රී ලංකාවේ ආන්දෝලනාත්මක ඝාතනයක් ලෙස ඉතිහාසයට එක් වූ නීතිඥ වෙස්ගෙන අධිකරණය වෙත ඇතුළු වී පාතාල කල්ලි නායක ගනේමුල්ල සංජීව නමැත්තා ඝාතනය කිරීමේ සිද්ධියට අදාළ ව එම අවස්ථාවේ මූලාසනයේ සිටි ප්රධාන මහේස්ත්රාත්වරියගෙන් ද ප්රකාශ ලබාගත් බව ජ්යෙෂ්ඨ පොලිස් නිලධාරියකු ප්රකාශ කර තිබෙනවා.
දසත අධිකරණ වාර්තාකාරිණිය පැවසුවේ ඒ අනුව මෙම ඝාතන සිදුවීමට අදාළව ඇසින් දුටු තවත් එක් ප්රබල සාක්ෂියක් වන එම අවස්ථාවේ අධිකරණයේ මූලාසනයේ සිටි මහේස්ත්රාත්වරිය ඉදිරියේ දී නඩු විභාගය අතරතුර ඊට අදාළ ඇසින් දුටු සාක්ෂි ලබාදෙනු ඇති බවයි.
කෙසේවෙතත් ප්රධාන මහේස්ත්රාත්වරියගෙන් ප්රකාශ සටහන් ලබා ගැනීමට පෙර කොළඹ දිසාව භාර නියෝජ්ය පොලිස්පතිවරයා හරහා ලිඛිතව ඉල්ලීමක් සිදුකර අවසර ලබාගෙන තිබෙනවා.
එම ප්රකාශයත් සමගම මේ වන විට ගනේමුල්ල සංජීවගේ ඝාතනය සම්බන්ධයෙන් කොළඹ අපරාධ කොට්ඨාසෙ මගින් සිදු කරන විමර්ශනවලට අදාළව පුද්ගලයන් 50කට ආසන්න පිරිසකගෙන් ප්රකාශ ලබාගෙන ඇති බවයි වාර්තා වන්නේ.
මනුෂ්ය ඝාතන ඇතුළු අපරාධ රැසක් මෙහෙය වූ පාතාල කල්ලි නායක සංජීව කුමාර සමරත්න හෙවත් ගනේමුල්ල සංජීව නමැත්තාව ඉකුත් මස 19 වෙනි දින බූස්ස බන්ධනාගාරයේ සිට කොළඹ අලුත් කඩේ අංක 5 මහේස්ත්රාත් අධිකරණය වෙත දැඩි ආරක්ෂාව මධ්යයේ රැගෙන වීමෙන් අනතුරුව විත්ති කූඩුව මත සිටියදී නීතිඥ වෙස්ගෙන පුටුවක අසුන්ගෙන සිටි වෙඩික්කරු එකවරම අසුනෙන් නැගිට කූඩුව අසලට ම පැමිණි වෙඩි ප්රහාරයක් එල්ල කර ගිනිඅවිය එම ස්ථානයේම දමා පලා ගොස් තිබුණා.
