ගණේමුල්ල සංජීව ඝාතන සිද්ධිය සම්බන්ධයෙන් අත්අඩංගුවට ගෙන රක්ෂිත බන්ධනාගාර ගතකර සිටින වෙඩික්කරු යැයි කියන සමිඳු දිල්ෂාන් පියුමංග නමැති සැකකරු කොළඹ මහෙස්ත්රාත් අධිකරණයේ පැවැති හඳුනාගැනීමේ පෙරට්ටුවකට ඉදිරිපත් කළ අතර එහිදී සාක්ෂිකරුවන්ට සැකකරු හඳුනා ගැනීමට නොහැකි වුණා.
දසත අධිකරණ වාර්තාකාරිණිය පැවසුවේ, බූස්ස බන්ධනාගාරයේ රඳවා සිටින මෙම සැකකරු දැඩි ආරක්ෂක විධිවිධාන මැද අද (04) කොළඹ මහෙස්ත්රාත් අධිකරණයට ඉදිරිපත් කළ බවයි.
එහිදී හඳුනාගැනීම සඳහා සාක්ෂිකරුවන් දෙදෙනෙකු අතිරේක මහේස්ත්රාත් හර්ෂන කැකුණවල මහතා හමුවට ඉදිරිපත් කළ අතර, ඔවුන්ට සැකකරු හඳුනා ගැනීමට නොහැකි වුණා.
ඉන් අනතුරුව මෙම සැකකරු දැඩි ආරක්ෂක විධිවිධාන මධ්යයේ කොළඹ ප්රධාන මහෙස්ත්රාත් තනූජා ලක්මාලී මහත්මියගේ නිල මැදිරියට ඉදිරිපත් කළා.
එහිදී සැකකරු මේ මස 06 වැනිදා දක්වා රක්ෂිත බන්ධනාගාරගත කරන ලෙස මහෙස්ත්රාත්වරිය නියෝග කළා.
එදිනට සැකකරු මාර්ගගත තාක්ෂණය ඔස්සේ අධිකරණයට ඉදිරිපත් කරන ලෙස ද මහෙස්ත්රාත්වවරිය නියෝග කළා.
ඉකුත් පෙබරවාරි 19 වැනිදා කොළඹ අලුත්කඩේ අතිරේක මහේස්ත්රාත් අධිකරණය තුළ විත්තිකුඩුව මත දී ගණේමුල්ල සංජිව නමැත්තා ඝාතනයට ලක් වුණා.
එම සිද්ධිය සම්බන්ධයෙන් ගිනිඅවිය අධිකරණය තුළට ගෙන ඒමට ආධාර දුන් සෙව්වන්දි නැමති 25 හැවිරිදි කාන්තාව ද මේ වන තුරු අත්අඩංගුවට ගැනීමට නොහැකි වු බව ද එහිදී පොලිසිය සඳහන් කළා.
