අධිකරණ ශාලාව තුළ විත්ති කූඩුවේ සිටිය දී වෙඩිවැදී මියගිය පාතාල කල්ලි සාමාජිකයෙකු වූ ගනේමුල්ලේ සංජීව නමැත්තා සම්බන්ධයෙන් සිදු කරන විමර්ශනයන්ට සියලු සහායන් ලබාදෙන ලෙස කොළඹ ප්රධාන මහේස්ත්රාත් තනූජා ලක්මාලි මහත්මිය ප්රධාන අධිකරණ රෙජිස්ටාර්වරයාට අද (19) නියෝග කළා.
සිද්ධියට අදාළ සියලු සීසීටීවී දර්ශන විමර්ශන අංශයන්ට ලබාදෙන ලෙසට ද රෙජිස්ටාර්වරයාට විනිසුරුවරිය විසින් නියෝග කර ඇති බවයි දසත අධිකරණ වාර්තාකරු පැවසුවේ.
ගනේමුල්ලේ සංජීව නමැත්තා වෙඩි වැදී මිය යෑම සම්බන්ධයෙන් කෙසෙල්වත්ත පොලිසිය ගොනු කළ බී වාර්තාවක් සලකා බැලීමෙන් අනතුරුව මහෙස්ත්රාත්වරිය එම නියෝග නිකුත් කළා.
කෙසෙල්වත්ත පොලිසියේ ස්ථානාධිපති ප්රධාන පොලිස් පරීක්ෂක සුජිත් ප්රියන්ත මහතා මගින් මෙම බී වාර්තාව අධිකරණයට ඉදිරිපත් කළා.
සිද්ධිය සම්බන්ධයෙන් කරුණු වාර්තා කළ පොලිස් නිලධාරින් අධිකරණයට කියා සිටියේ අදාළ සිදුවීම සම්බන්ධයෙන් එම අවස්ථාවේදී ම පුළුල් විමර්ශනයක් ආරම්භ කළ බවයි.
ඊට පොලිසියේ විවිධ අංශ සහාය දක්වා ඇති බවත් සීසීටිවි දර්ශන තවදුරටත් ලබා ගැනීමට ඇති හෙයින් අදාළ දර්ශන ලබාදෙන ලෙසට රෙජිස්ටාර්වරයාට නියෝග කරන ලෙසත් ඉල්ලා සිටියා.
මරණ පරීක්ෂණය සූදානම් කර ඇති හෙයින් ඒ සම්බන්ධයෙන් නියෝග නිකුත් කරන ලෙස ද ඉල්ලා සිටි අතර
ඉදිරිපත් කළ කරුණු සලකා බැලූ ප්රධාන මහේස්ත්රාත්වරිය ඉල්ලා සිටින ලද අදාළ නියෝග නිකුත් කරමින් මරණ පරීක්ෂණය මහෙස්ත්රාත්වරියගේ සහභාගිත්වයෙන් අද පස්වරු 2.30ට සිදු කළා.
