පසුගිය දිනවල පොළොන්නරුව ප්‍රදේශයට නොකඩවා ඇද හැළුණු අධික වර්ෂාවත් සමඟඑතිහාසික සෝමාවතිය පුදබිම පැවතියේ ජලයෙන් යටවයි.
කාලගුණය යහපත් තත්ත්වයට පත්වීමත් සමඟින් චෛත්‍ය මළුවේ පිරී පැවති ජලය මේ වන විට ක්‍රමයෙන් බැස ගොස් ඇති අතර ආරක්ෂක අංශ එක්ව චෛත්‍ය මළුව පිරිසිදු කිරීමේ කටයුතු සිදුකරනු ලබනවා.
අධික වර්ෂාවත් සමඟ මහවැලි ගඟ පිටාර ගැලීම හේතුවෙන් සෝමාවතිය චෛත්‍ය මළුව සහ මළුවට පිවිසෙන මාර්ගය අඩි 6ක් පමණ ජලයෙන් යටව පැවතුණා.
චෛත්‍යය මළුව ජලයෙන් යටවී තිබීම හේතුවෙන් සංඝයා වහන්සේලා දෙවැනි මහල සංඝාවාසයේ වැඩ සිට චෛත්‍යයට පුද පූජා පැවැත්වීම සිදුකරනු ලැබුවා.
කාලගුණය යහපත් තත්ත්වයට පත්වීමත් සමඟ මේ වන විට චෛත්‍ය මළුවේ සහ චෛත්‍යයට පිවිසෙන මාර්ගයේ පැවති ජලය සම්පූර්ණයෙන් බැස ගොස් තිබෙනවා.
දින ගණනක් පුරා ජලයෙන් යටව පැවතීම හේතුවෙන් චෛත්‍ය මළුව රොන්මඩ වලින් වැසී පැවතුණා.
අද දිනයේ යුද හමුදාව, පොලිසිය හා සිවිල් ආරක්ෂක අංශ සෙබළුන් එක්ව රොන්මඩ ඉවත් කර මළුව පිරිසිදු කිරීමේ කටයුතු සිදු කරනු ලැබුවා.
සෝමාවතිය චෛත්‍ය වන්දනාව සඳහා පැමිණෙන සැඳැහැවතුන්ට බාධාවකින් තොරව සුපුරුදු පරිදි සිය වන්දනාමාන කටයුතු සිදුකර ගැනීමට පහසුකම් සැලසෙනු ඇති.
