ගංජා නීතිගත කිරීමේ ව්‍යවස්ථා සංශෝධනයට ඩොනල්ඩ් ට්‍රම්ප් සැරසෙයි

තමා උපන් ජනපදය වන ෆ්ලොරිඩා ජනපදයේ විනෝදාස්වාදය සඳහා ගංජා නීතිගත කිරීමේ ව්‍යවස්ථා සංශෝධනයට ඇමෙරිකානු ජනපති ධුර අපේක්‍ෂක හිටපු ජනපති ඩොනල්ඩ් ට්‍රම්ප් සහය පළකර තිබෙනවා.

ඒ අනුව ලබන නොවැම්බරයේ සිට බලාත්මක වීමට යෝජිත ෆ්ලොරිඩා ජනපදයේ ව්‍යවස්ථා සංශෝධනයත් සමග අවුරුදු 21 ඉක්ම වූ පුද්ගයින්ට තම පුද්ගලික අවශ්‍යතාවය මත කිසිදු වෛද්‍ය නිර්දේශයකින් තොරව ගංජා ලබා ගත හැකියි.

අමෙරිකාවේ බොහෝ ජනපදවල ගංජා නීත්‍යානුකූලව පවතින විට ෆ්ලොරීඩාවේ ගංජා ළඟ තබාගත් පුද්ගලයෙකු අපරාධකරුවෙකු සේ නොසැලකිය යුතු බවයි ඩොනල්ඩ් ට්‍රම්ප් අවධාරණය කරන්නේ.

ඔවුන් සතුව පුද්ගලික ගංජා සුළු ප්‍රමාණයක් ළඟ තබා ගැනීමේ හේතුව මත නිරපරාදේ අත්අඩංගුවට ගෙන ඔවුන්ගේ ජීවිත විනාශ කිරීමට
තමන් යටතේ පවතින රජයක් සුදානම් නැති බවත් ට්‍රම්ප් ප්‍රකාශ කර තිබෙනවා.

යෝජිත සංශෝධනය යටතේ ස්වාධීනව ගංජා වගා කිරීම තවදුරත් නීති විරෝධී නොවන ඕනෑම පුද්ගලයෙකුට ගංජා අවුන්ස 03 ක් දක්වා ළඟ තම ගැනීමට නීතියෙන් අවසරය හිමි වනවා.

ට්‍රම්ප් සිය පුද්ගලික සමාජ මාධ්‍යයක සටහනක් දක්වමින් කියා සිටින්නේ, “අපි යන සෑම තැනකම ගංජා සුවඳ දැනීම නැති කිරීම සඳහා පොදු ස්ථානවල ගංජා භාවිතය තහනම් කරන රෙගුලාසි ක්‍රියාත්මක කරන ලෙස තම ජනපදයේ නීති සම්පාදකයින්ගෙන් ඉල්ලීමක් කරන බවයි”.

දැනටමත් ජනපද 50 කින් සමන්විත ඇමෙරිකාවේ ජනපද 24 ක විනෝදාස්වාදය වෙනුවෙන් ගංජා භාවිතය හා ළඟ තබා ගැනීමට නීතියෙන් අවසර හිමිව තිබෙනවා.

තවත් ජනපද 14ක් වෛද්‍යමය අවශ්‍යතා සඳහා ගංජා ළඟ තබා ගැනීම හා භාවිතයට නීතියෙන් ඉඩ ලබා දී ඇති බවයි විදෙස් මාධ්‍ය පෙන්වා දෙන්නේ.