රුපියල් කෝටියක් පමණ වටිනා කුෂ් මත්ද්‍රව්‍ය තොගයක් සිය ගමන් මල්ලේ සූක්ෂම ලෙස සඟවා ගෙන පැමිණි විදේශිකයෙක් කටුනායක ගුවන් තොටුපොළේ දී අත්අඩංගුවට ගෙන තිබෙනවා.
ඊයේ (23) පස්වරුවේ මෙම විදෙස් ජාතිකයා පොලිස් මත්ද්‍රව්‍ය කාර්යාංශයේ නිලධාරීන් අත්අඩංගුවට ගෙන ඇති බවයි වාර්තා වුණේ.
මෙලෙස අත්අඩංගුවට ගැනුණු විදෙස් ජාතිකයා 34 හැවිරිදි රුසියානු ජාතිකයෙක් වන අතර, සැකකරු තොරතුරු තාක්ෂණ නිලධාරීවරයෙකු ලෙස සේවය කරන්නෙක් බවයි අනාවරණය වී ඇත්තේ.
මොහු මෙම කුෂ් මත්ද්‍රව්‍ය වගා කර, සකස් කර, ලොව පුරා රටවල් අතර බෙදාහැරීමේ ජාවාරමක ද නිරත පුද්ගලයෙකු බවටයි අනාවරණය කරගෙන ඇත්තේ.
තායිලන්තයේ බැංකොක් නුවර සිට ශ්‍රී ලන්කන් ගුවන් සේවයේ යූ.එල්.- 403 දරණ ගුවන් යානයෙන් ඊයේ (23) මොහු කටුනායක ගුවන් තොටුපොළ වෙත පැමිණ තිබුණා.
මොහු විසින් රැගෙන ආ ගමන් මල්ල තුළ වූ ස්පොන්ජ් යොදා සකස් කළ නිදාගැනීමට භාවිත කරන කොට්ටයක් තුළ කිලෝ ග්‍රෑම් 01යි ග්‍රෑම් 50ක් බරැති කුෂ් මත්ද්‍රව්‍ය තොගය සූක්ෂම ලෙස සඟවා තිබිය දී සොයාගෙන තිබෙනවා.
අත්දන්ගුවට ගැනුණු රුසියානු ජාතිකයා ඊයේ (23) මීගමුව මහේස්ත්‍රාත් අධිකරණය වෙත ඉදිරිපත් කර ඇති අතර, එහිදී ඔහු ලබන 29 වනදා දක්වා රදවා තබා ගෙන ප්‍රශ්න කිරීම අවසර ලබාදී තිබෙනවා.
ඒ අනුව සැකකරු වැඩිදුර විමර්ශන කටයුතු සඳහා පොලිස් මත්ද්‍රව්‍ය කාර්යාංශයේ මූලස්ථානය වෙත භාරදීමට පියවර ගෙන ඇති බවයි වාර්තා වුණේ.
