ලන්ඩනයේ පැරණිතම සහ විශාලතම ආහාර වෙළෙඳපොළක් වන බරෝ මාකට් හි කොස් ගෙඩියක් ස්ටලින් පවුම් 160ක් මුදලකට අලෙවි කිරීමට තබා ඇති ඡායාරූපයක් පිළිබඳ ප්‍රවෘත්තියක් BBC සිංහල පුවත් අඩවිය විසින් අද (23) දින වාර්තා කර තිබෙනවා.
ඒ අනුව ලන්ඩනයේ දී කොස් ගෙඩියකට නියම කර ඇති මිල ශ්‍රී ලංකා මුදලින් රුපියල් 44,200 ක් පමණ වනු ඇති.
මෙම ඡායාරූපය BBC වාර්තාකරුවෙකු වන රිකාඩෝ සෙන්රා විසින් ගෙන තිබෙන අතර, එය ඔහුගේ මව්රට වන බ්‍රසීලයේ Twitter ප්‍රජාව අතර සැණින් ප්‍රචලිත වී තිබෙනවා.
එය 100,000 වාරයකට වඩා Share වී තිබෙනවා.
බ්‍රසීලයේ බොහෝ ප්‍රදේශවල දී නැවුම් කොස් ගෙඩියක් ඩොලර් 1.10ට සමාන මිලකට (රු. 230ක පමණ මිළකට) සොයාගත හැකි අතර අනෙකුත් බොහෝ නිවර්තන රටවල ද ඒ හා සමානව දැරිය හැකි මුදලකට මිලට ගත හැකියි.
බොහෝ තැන්වල බහුලව පිහිටා ඇති කොස් ගස්වලින් නොමිලේම ගෙඩියක් නෙලාගත හැකි නමුත්, ඵලදාවෙන් අති බහුතරය බ්‍රසීලයේ වීදි අයිනේ වැටී, නරක් වී යනු දක්නට ලැබෙනවා.
