නල්ලතන්නිය පොලිස් වසමේ ලක්ෂපාන වාලමලෙයි හින්දු කෝවිලේ පැවති වාර්ෂික උත්සවයකින් අනතුරුව ලබාදුන් ආහාර අනුභව කළ පුද්ගලයින් පිරිසක් හදිසියේ ඇති වූ රෝගී තත්ත්වයක් හේතුවෙන් රෝහල් ගතකර තිබෙනවා.
ඊයේ (07) රාත්‍රියේ මොවුන් පිරිස මෙලෙස රෝහල් ගතකර ඇති අතර, කුඩා දරුවන් ඇතුළු පුද්ගලයින් 120ක් පමණ මස්කෙළිය ප්‍රාදේශිය රෝහල වෙත ඇතුළත් කර ඇති බවයි වාර්තා වුණේ.
ක්ලාන්තය, වමනය, උදරයේ අබාධ සහ පාචනය යන රෝග ලක්ෂණ ඇතිව එම පිරිස රෝහල් ගතව ඇති බවයි රෝහල් ආරංචි මාර්ග සඳහන් කළේ.
රෝගි වූ වැඩි පිරිසක් කාන්තාවන් බවත්, දැනට නේවාසිකව ප්‍රතිකාර ලබන රෝගින්ගේ තත්ත්වය බරපතල නොවන බව ද වාර්තා වනවා.
මහජන සෞඛ්‍ය පරික්ෂකවරුන්ගේ කිසිදු අවසරයක් හෝ අධීක්ෂණයකින් තොරව බෝංචි, වට්ටක්කා, බටු සහ පතෝල යන ව්‍යාංජන සහිත බත් පාර්සල් 2000ක් සකස්කර වතු කම්කරුවන්ට බෙදා දී ඇති බවයි තොරතුරු වාර්තා වුණේ.
මේ අතර ඊයේ (07) දින රාත්‍රියේ ම එම වතුයායට ගොස් වතු කම්කරුවන්ට ලබාදුන් ආහාර පාර්සල්වල සාම්පල ලබාගත් බවත්, එම ආහාර සාම්පල රජයේ රස පරික්ෂකවරයා වෙත යොමුකරන බවයි බවයි මස්කෙළිය සෞඛ්‍ය වෛද්‍ය නිලධාරි කාර්යාලයේ මහජන සෞඛ්‍ය පරික්ෂකවරයා කියා සිටියේ.
