කේරළ ගංජා සමග දෙදෙනෙක් නාවික හමුදා අත්අඩංගුවට

අලෙවි කිරීම සඳහා ප්‍රවාහනය කරමින් තිබූ කේරළ ගංජා කිලෝග්‍රෑම් 3කටඅධික තොගයක් සමඟ පුද්ගලයන් දෙදෙනෙකු සහ යතුරු පැදියක් අත්අඩංගුවට ගෙන තිබෙනවා.

නාවික හමුදාව, පොලිසිය සමග එක්ව ඊයේ (25) දහවල් යාපනය, කයිට්ස් දූපතේ නරන්තනේ ප්‍රදේශයේ සිදු කළ ඒකාබද්ධ සෝදිසි මෙහෙයුමකදීයි මෙම අත්අඩංගුවට ගැනීම සිදු කර ඇත්තේ.

මෙම සෝදිසි මෙහෙයුමේදී, මාර්ගයේ ගමන් ගත් සැක කටයුතු යතුරු පැදියක් පරීක්ෂාවට ලක් කරනු ලැබුවා.

එහිදී එම යතුරු පැදියේ ගමන් ගත් පුද්ගලයන් දෙදෙනා සන්තකයේ තිබී අලෙවි කිරීම සඳහා ප්‍රවාහනය කරමින් තිබූ පාර්සල් දෙකක අසුරන ලද කේරළ ගංජා කිලෝ 03යි ග්‍රෑම් 592ක පමණ තොගයක් සොයා ගැනුණා.

අනතුරුවයි එම සැකකරුවන් දෙදෙනා සහ යතුරු පැදිය මෙලෙස අත්අඩංගුවට ගෙන ඇත්තේ.

අත්අඩංගුවට ගත් මෙම කේරළ ගංජා තොගයේ දළ වටිනාකම රුපියල් මිලියනයකට අධික වෙතැයි විශ්වාස කෙරෙනවා.

සැකකරුවන් වයස අවුරුදු 27ක් හා 34 ක් වන මන්නාරම සහ කයිට්ස් ප්‍රදේශයේ පදිංචිකරුවන්.

ඔවුන් දෙදෙනා, කේරළ ගංජා තොගය සහ යතුරු පැදිය ඉදිරි නීතිමය කටයුතු සඳහා කයිට්ස් පොලිසිය වෙත භාරදී තිබෙනවා.