තායිලන්තයේ පැවති 37 වන “සෙපක්තක්රෝ ”(Sepaktakraw) ලෝක ශූරතා කින්ග්ස් කප් තරගාවලියට (Kings Cup ) සහභාගී වූ, ශ්‍රී ලංකා සෙපක්තක්රෝ කණ්ඩායම, එහි ඉසව් 05කින් ලෝකඩ පදක්කම් 05ක් පළමු වරට දිනාගෙන ඊයේ (10) රාත්‍රියේ දී කටුනායක ගුවන් තොටුපොළ වෙත පැමිණ තිබෙනවා.
මෙම තරගාවලිය තායිලන්තයේ කොරාත් නුවර, ලෝකයේ රටවල් 29ක ක්‍රීඩක ක්‍රීඩිකාවන් 750ක පමණ පිරිසකගේ සහභාගීත්වයෙන් ඉකුත් සැප්තැම්බර් 01 වැනි දින සිට 08 වැනි දින තෙක් පැවැත්වුණා.
සෙපක්තක්රෝ යනු පාද උපයෝගී කරගෙන සිදු කෙරෙන වොලිබෝල් ක්‍රීඩාවක් වන අතර, මෙම ක්‍රීඩාව තායිලන්තයෙන් ආරම්භ වී අග්නිදිග ආසියාව පුරා පැතිර ගිය, ව‍ර්තමානයේ බටහිර රටවල් කික් වොලිබෝල් (Kick Volleyball ) ලෙස ද හඳුන්වන ක්‍රීඩාව මෙය බවයි පැවසෙන්නේ.
වොලිබෝල් ක්‍රීඩාවට අදාළ සියලුම නීතිරීති මෙම ක්‍රීඩාවට ඒ ආකාරයෙන්ම අදාළ වන බව ශ්‍රී ලංකා සෙපක්තක්රෝ ක්‍රීඩා සම්මේලනයේ සභාපති නිලාම් හලාල්ඩීන් මහතා කටුනායක ගුවන් තොටුපොළේ දී අප ගුවන්තොටුපොළ වාර්තාකරු සමග පවසා තිබෙනවා.
තායිලන්තයේ බැංකොක් නුවර සිට ඒ.කේ.- 047 දරන ගුවන් යානයෙන් මෙම ශූරයින් දිවයිනට ළඟා වූ බවයි වාර්තා වන්නේ.
