කැළණි ගඟ ද්රෝණියේ ඉහළ ධාරා ප්රදේශවලට මේ වන විට මිලිමීටර් 300 කට ආසන්න සැළකිය යුතු වර්ෂාපතනයක් ලැබී ඇති බව වාරි මාර්ග දෙපාර්තමේන්තුව පවසනවා.
එම වර්ෂා තත්ත්වය සහ වාරි මාර්ග දෙපාර්තමේන්තුව මඟින් කැළණි ගඟ ද්රෝණිය තුළ නඩත්තු කරනු ලබන ගංඟා ජල මාපකවල ජල මට්ටම් විශ්ලේෂණය අනුව ඉදිරි පැය 24 ක කාලය තුළ රුවන්වැල්ල, සීතාවක, දොම්පෙ, දෙහිඕවිට, ඇහැළියගොඩ, යටියන්තොට, බුලත්කොහුපිටිය යන ප්රාදේශීය ලේකම් කොට්ඨාශයට අයත් කැළණි ගංඟා නිම්නයේ පහත්බිම් ප්රදේශ වලට සුළු ගංවතුර තත්ත්වයක් ඇති විය හැකි බවට අනතුරු අඟවන්නේ.
මෙම තත්ත්වය සම්බන්ධයෙන් දැඩි සැලකිල්ලකින් කටයුතු කරන ලෙස එම ප්රදේශවල පදිංචි මහජනතාවගෙන් සහ ප්රදේශ හරහා ගමන් ගන්නා වාහන පදවන්නන්ගෙන් එම දෙපාර්තමේන්තුව ඉල්ලා සිටිනවා.
එමෙන්ම තවදුරටත් වර්ෂාව අධික වුවහොත් හංවැල්ල ප්රදේශයෙන් පහළ කැළණි ගංඟා නිම්නයේ පහත්බිම් ප්රදේශ වලටද මෙම ගංවතුර තත්ත්වය ඇති වීමට ඉඩ පවතින බවත් අනතුරු අඟවනවා.
මේ අතර, පවතින අධික වර්ෂාපතනය හමුවේ අත්තනගලු ඔය ආශ්රිතව සුළු ගංවතුර තත්ත්වයක් දක්වා වර්ධනය විය හැකි බව වාරිමාර්ග දෙපාර්තමේන්තුව පවසනවා.
ඊයේ (21) රාත්රියේ සිට ඇද හැලෙන වර්ෂාපතනය හමුවේ ගංගා ද්රෝණි කිහිපයක ජල මට්ටම් ඉහළ ගොස් ඇති බවයි එම දෙපාර්තමේන්තුව සඳහන් කළේ.
ඒ, අනුව දූනමලේ මිනුම් මධ්යස්ථානයට අනුව මේ වන විට මිලිමීටර් 200 ඉක්මවූ වැසි වාර්තා වී ඇති බවත් ඉහළ ද්රෝණියේ ඇතැම් ස්ථානවලට මිලිමීටර් 250ට ඉක්මවූ වැසි වාර්තා වී ඇති බවත් දැනුම් දෙනවා.
මේ හේතුවෙන් ගම්පහ, කටාන, වත්තල වැනි පහත්බිම් ජලයෙන් යටවීමේ අවධානමක් පවතින බවයි එම දෙපාර්තමේන්තුව පෙන්වා දුන්නේ.
