ඊයේ (14) දිනයේ වැඩිම වර්ෂාපතනය අවිස්සාවේල්ල ප්‍රදේශයෙන් වාර්තා වී ඇති බව වාරිමාර්ග අධ්‍යක්ෂ (ජල කළමනාකරණ)ඉංජිනේරු එච්.එම්.පී.එස්.ඩී. හේරත් සඳහන් කරනවා.
මිලි මීටර් 180ක වර්ෂාපතනයක් එම ප්‍රදේශයට ලැබී ඇති බවයි අධ්‍යක්ෂවරයා සඳහන් කළේ.
එමෙන්ම හංවැල්ල ප්‍රදේශයට මිලි මීටර් 158ක සහ දැරණියගල ප්‍රදේශයට මිලි මීටර් 122 වර්ෂාපතනයන් වාර්තා වී ඇති බවයි ඔහු සඳහන් කර සිටියේ.
මේ හේතුවෙන් කැළණි ගඟේ ජල මට්ටම ඊයේ (14) රාත්‍රිය වන විට සැළකිය යුතු ඉහළ යාමක්‌ පෙන්නුම් කළ බවයි වාරිමාර්ග අධ්‍යක්ෂවරයා පැවසුවේ.
කෙසේ වෙතත් කැළණි ගඟේ ජල මට්ටම ගංවතුර අනතුරු ඇඟවීම් මට්ටම දක්වා වැඩිවීමක් පෙන්නුම් නොකරන බවයි ඔහු අවධාරණය කළේ.
මේ අතර පවතින වර්ෂාපතනයත් සමඟ කැළණි ගඟ, මාඔය සහ කළු ගඟ යන ප්‍රධාන ගංගා ආශ්‍රිත පහත් බිම්වල සිටින ජනතාව අවධානයෙන් සිටිය යුතු බවයි ඔහු දැනුම් දෙන්නේ.
මේ අතර අත්තනගලු ඔය ආශ්‍රිත පහත්බිම්වල ඇතැම් ස්ථානවල මේ වනවිටත් සුළු ගංවතුර තත්ත්වයක් පවතින බවයි ඔහු වැඩිදුරටත් සඳහන් කර සිටියේ.
එමෙන්ම වාරිමාර්ග අධ්‍යක්ෂවරයා සඳහන් කරන්නේ ප්‍රධාන ජලාශ 19ක සහ මාධ්‍යම ප්‍රමාණයේ ජලාශ 19ක වාන් දොරටු විවෘත කර ඇති බවයි.
,
