ගිනිකොණදිග බෙංගාල බොක්ක මුහුදු ප්රදේශයේ පවතින ගැඹුරු පීඩන අවපාතයක් පිළිබඳ එම ප්රදේශයේ යාත්රා කරන බහු දින ධීවර යාත්රා සඳහා කාලගුණ විද්යා දෙපාර්තමේන්තුවේ ස්වභාවික විපත් පිළිබඳ පූර්ව අනතුරු ඇඟවීමේ මධ්යස්ථානය විසින් අනතුරු ඇඟවීමේ නිවේදනයක් නිකුත් කර තිබෙනවා.
ඒ හෙට (11) දහවල් 12 තෙක් වලංගු වන ආකාරයෙන්.
එමගින් දන්වා ඇත්තේ ගිනිකොණදිග බෙංගාල බොක්ක මුහුදු ප්රදේශයේ පැවති පීඩන අවපාතය ගැඹුරු පීඩන අවපාතයක් දක්වා වර්ධනය වී ඇති බවයි.
එය අද (10) සවස් කාලයේදී සුළි කුණාටුවක් දක්වාත් හෙට (11) දිනයේදී මධ්යම බෙංගාල බොක්ක මුහුදු ප්රදේශයේදී චණ්ඩ සුළි කුණාටුවක් දක්වාත් වර්ධනය වීමට බොහෝ දුරට ඉඩකඩ පවතිනවා.
එම පද්ධතිය උතුරුට බරව ඊසාන දෙසට ගමන් කරමින් බංග්ලාදේශ සහ මියන්මාර වෙරළ තීරය වෙත ළඟා වනු ඇති බවටයි බලාපොරොත්තු වන්නේ.
මෙම පද්ධතියේ බලපෑමෙන් ඉදිරි පැය 24 තුල උතුරු අක්ෂාංශ 03ත් 20ත් සහ නැගෙනහිර දේශාංශ 85 සහ 100ත් අතර ප්රදේශවල සුළඟේ වේගය පැයට කිලෝමීටර් 50ක් 60ක් පමණ වන අතර විටින් විට පැයට කිලෝමීටර් 70ක් 80ක් පමණ දක්වා වැඩිවිය හැකියි.
අදාළ මුහුදු ප්රදේශ ඉතා රළු වන අතර තද වැසි හෝ ගිගුරුම් සහිත වැසි ද ඇතිවිය හැකි බව කාලගුණ විද්යා දෙපාර්තමේන්තුව ප්රකාශ කළා.
මේ හේතුවෙන් එම මුහුදු ප්රදේශයට නැවත දැනුම් දෙන තුරු යාත්රා නොකරන ලෙසටයි ධී්වර සහ නාවික ප්රජාවන්ට දැනුම් දෙන්නේ.
දැනට මෙම මුහුදු ප්රදේශවල ධීවර කටයුතුවල යෙදී සිටින පිරිස වහාම ගොඩබිමට හෝ ආරක්ෂිත ස්ථානයක් වෙත පැමිණෙන ලෙසට දැනුම්දී තිබෙනවා.
එමෙන්ම ගාල්ල සිට මාතර සහ හම්බන්තොට හරහා පොතුවිල් දක්වා වෙරළට ඔබ්බෙන් වන මුහුදු ප්රදේශවල ධීවර කටයුතුවල යෙදෙන විට අවධානයෙන් කටයුතු කරන ලෙසට ද ඉල්ලීමක් කෙරෙනවා.
ඊට අමතරව කාලගුණ විද්යා දෙපාර්තමේන්තුව මගින් මේ සම්බන්ධව නිකුත් කරන ඉදිරි නිවේදන පිළිබඳ අවධානය යොමු කරන ලෙසටයි ධීවර හා නාවික ප්රජාවගෙන් ඉල්ලීමක් කෙරෙන්නේ.
