කෝප් සහ කෝපා කාරක සභා නිර්දේශ ක්රියාත්මක කිරීම විමර්ශනය සඳහා මැලේසියාව, ඉන්දියාව ආදී රටවල ක්රියාත්මක වන ආකාරයේ යාන්ත්රණයක් සැකසිය යුතු බව රජයේ ගිණුම් පිළිබඳ කාරක සභාව විසින් ලබා දී ඇති නිර්දේශ ක්රියාත්මක කිරීම විමර්ශනය කිරීම සඳහා වූ අනු කාරක සභාවේ දී යෝජනා වී තිබෙනවා.
පාර්ලිමේන්තු මාධ්ය අංශය නිවේදනයක් නිකුත් කරමින් සඳහන් කළේ; දැනට රජයේ ගිණුම් පිළිබඳ කාරක සභාව (කෝපා කමිටුව) සහ පොදු ව්යාපාර පිළිබඳ කාරක සභාව (කෝප් කමිටුව) විසින් ලබාදෙනු ලබන නිර්දේශ ක්රියාත්මක කිරීම ප්රමාද වීම සහ ක්රියාත්මක නොවීම පිළිබඳ පසුවිපරම් කිරීමටත් ඒ සම්බන්ධ ව අදාළ පියවර ගැනීම සඳහාත් නිසි යාන්ත්රණයක් සකස් කිරීමට අදාළ ව මෙම නව යාන්ත්රණය සැකසීම වැදගත් වන බවයි.
මේ වන විට කෙටුම්පත් කර ඇති නිර්දේශ සහිත වාර්තාව පිළිබඳ ව කරුණු ද මෙහිදී සාකච්ඡා වුණු අතර කෝපා සහ කෝප් කාරක සභා නිර්දේශ අදාළ කාරක සභාවේ තීරණය පරිදි නීතිපතිවරයාට යොමු කිරීමට අමතර ව අල්ලස් හෝ දූෂණ
චෝදනා විමර්ශන කොමිෂන් සභාව හෝ වෙනත් නීතිය බලාත්මක කරන ආයතනයක් වෙත යොමු කිරීමේ අවශ්යතාව ද මෙහිදී සාකච්ඡා කෙරුණා.
එම ආයතනවලට ද ඒ පිළිබඳ පියවර ගැනීම සදහා නිශ්චිත කාලරාමුවක් හඳුන්වා දිය යුතු බවයි මෙහිදී දැනුම්වත් කෙරුණේ.
මැලේසියාව, ඉන්දියාව වැනි රටවල ද මෙම කාරක සභා නිර්දේශ ක්රියාත්මක කිරීම අධීක්ෂණය සදහා විශේෂිත යාන්ත්රණයක් සහ ආයතනයක් පවතින බවත් එවැනි යාන්ත්රණයක් මෙරට ඇති කළ යුතු බවත් මෙහිදී සාකච්ඡා කෙරුණා.
අවසන් වාර්තාව කෝප් සහ කෝපා කාරක සභා ඒකාබද්ධව පාර්ලිමේන්තුවට කඩිනමින් ඉදිරිපත් කිරීමටත් තීරණයක්
රජයේ ගිණුම් පිළිබඳ කාරක සභාව විසින් ලබා දී ඇති නිර්දේශ ක්රියාත්මක කිරීම විමර්ශනය සඳහා පත්කර ඇති අනු කාරක සභාව එහි සභාපති පාර්ලිමේන්තු මන්ත්රී තිස්ස අත්තනායකගේ ප්රධානත්වයෙන් පෙරේදා (18) දින රැස් වූ අවස්ථාවේ දීයි මේ බව අනාවරණය කෙරුණේ.
