දකුණු කොරියාවේ සහ මැලේසියාවේ පැවති කායවර්ධන සහ ශාරීරික ක්‍රීඩා තරගාවලි දෙකකට සහභාගී වී ඒවායින් රිදී පදක්කම් 03 ක් සහ ලෝකඩ පදක්කමක් දිනා ගත් තෙනුර ලක්සෙන් ක්‍රීඩකයා අද කටුනායක ගුවන් තොටුපොළ වෙත පැමිණියා.
දකුණු කොරියාවේ පැවති 14 වන ලෝක කායවර්ධන සහ ශාරීරික ක්‍රීඩා තරගාවලියේ දී කනිෂ්ඨ කිලෝග්‍රෑම් 75 ට වැඩි බර පන්තිය යටතේ තරග කළ තෙනුර එහිදී දෙවන ස්ථානයට පත් වෙමින් රිදී පදක්කම දිනා ගැනීමට සමත් වුණා.
මෙම තරගාවලිය ඉකුත් 06 වැනි දින සිට 12 වැනි දින දක්වා සියෝල් නුවර දී පැවැත්වුණා.
මැලේසියාවේ ක්වාලාලම්පූර් නුවර දී පසුගිය 26 සහ 27 දිනවල පැවති කායවර්ධන ජාත්‍යන්තර ෆෙඩරේෂන තරගාවලියේ දී තෙනුර ලක්සෙන් ක්‍රීඩකයා කායවර්ධන කනිෂ්ඨ විවෘත අංශයෙන්, ස්පෝර්ට්ස් කනිෂ්ඨ විවෘත අංශයෙන් රිදී පදක්කම් 02 ක් සහ ක්ලැසික් කනිෂ්ඨ විවෘත අංශයෙන් ලෝකඩ පදක්කමක් දිනා ගැනීමට සමත් වූ බවත් වාර්තා වනවා.
20 හැවිරිදි තෙනුර ක්‍රීඩකයා මෙම ජයග්‍රහණ රැගෙන අද උදෑසන 09.30 ට මැලේසියාවේ ක්වාලාලම්පූර් නුවර සිට ශ්‍රී ලන්කන් ගුවන් සේවයේ යූ.එල්.- 219 දරන ගුවන් යානයෙන් කටුනායක ගුවන් තොටුපොළ වෙත පැමිණ සිටි අතර ඔහු පිළිගැනීමට සිය මව ඇතුළු පිරිසක් ගුවන් තොටුපොළ වෙත පැමිණ තිබුණා.
