තායිලන්ත – කාම්බෝජ දේශසීමාවේ පැවති ගැටුම්වලින් අනතුරුව කාම්බෝජය විසින් තායිලන්තයෙන් වහාම සටන් විරාමයක් ඉල්ලා තිබෙනවා.
කෙසේ වෙතත් තායිලන්තය සටන් විරාම යෝජනාව පිළිබඳව ප්‍රසිද්ධියේ අදහස් දක්වා නොමැති අතර, මීට පෙර කාම්බෝජයට මායිම්ව ඇති දිස්ත්‍රික්ක අටක යුද නීතිය ප්‍රකාශයට පත් කරනු ලැබුවා.
පසුගිය බ්‍රහස්පතින්දා පළමු වෙඩි තැබීම සම්බන්ධයෙන් එකිනෙකාට චෝදනා කරන රටවල් දෙකෙහිම මෙම යුද ගැටුම් හේතුවෙන් අවම වශයෙන් පුද්ගලයින් 16 දෙනෙකු මිය ගොස් දසදහස් ගණනක් අවතැන් වී සිටිනවා.
තායිලන්තයේ වැඩබලන අගමැති ෆුම්තම් වෙචයාචායි ඊයේ අනතුරු ඇඟවූයේ මෙම ගැටුම් දරුණු යුද්ධයක් කරා ගමන් කළ හැකි බවයි.
සටන් සඳහා දෙපාර්ශවයම මේ වනවිට බර අවි යොදාගැනීමට ද කටයුතු කර තිබෙනවා.
මේ අතර, ගෝලීය නායකයින් වහාම සටන් විරාමයක් සඳහා ආයාචනා කළද, ගැටුමේදී තෙවන පාර්ශවීය මැදිහත්වීමක් සඳහා අවශ්‍යතාවයක් නොමැති බවයි තායිලන්ත විදේශ අමාත්‍යවරයා පවසා ඇත්තේ.
