පොලිස් නිලධාරියෙකු ඉදිරිපිට දී කාන්තාවකගේ ගෙළ සහ කට ප්රදේශය පිහියකින් කපා තුවාල සිදුකර පළා ගොස් ඇති අනියම් පුරුෂයා අත්අඩංගුවට ගැනීමට විමර්ශණයක් ආරම්භ කර ඇති බව වෙන්නප්පුව පොලීසිය පවසනවා.
ඊයේ (05) පස්වරුවේ වෙන්නප්පුව – අංගම්පිටිය ප්රදේශයේ උළු කර්මාන්තශාලා භූමියක කම්කරු නිවාසයක් තුළ දී මෙම සිද්ධිය සිදුව ඇති බවයි වාර්තා වන්නේ.
පිහි ප්රහාරයෙන් තුවාල ලබා ඇත්තේ 30 හැවිරිදි වියේ පසු වූ නිකවැරටිය ප්රදේශයේ පදිංචි කාන්තාවක් බවයි පොලිසිය පැවසුවේ.
අදාළ කාන්තාව තම විවාහක ස්වාමිපුරුෂයාගෙන් සහ දරුවන්ගෙන් වෙන්ව වෙනත් පුරුෂයින් කීපදෙනෙකු සමඟ පසුගිය කාලය තුළ ජීවත්ව ඇති බවයි අනාවරණය වී ඇත්තේ.
එලෙස සිව්වන අනියම් පුරුෂයා ලෙස තෝරාගත් පුද්ගලයා සමඟ අදාළ කාන්තාව මීට මාස 02 කට පමණ පෙර වෙන්නප්පුව – අංගම්පිටිය ප්රදේශයේ පවත්වා ගෙන යන උළු කර්මාන්ත ශාලාවක් වෙත පැමිණ ඇති බව සඳහන්.
අනතුරුව එම කර්මාන්ත ශාලාවේ කම්කරු නිවාසයක පදිංචි වී දෙදෙනාම කම්කරුවන් ලෙස එහි සේවය කර ඇති බවයි වාර්තා වන්නේ.
තම අනියම් පුරුෂයා විසින් තමන්ට නිතර පහර දෙමින් වධ හිංසා කරන බවට මෙම කාන්තාව පසුගිය 04 වනදා වෙන්නප්පුව පොලීසියට ගොස් පැමිණිල්ලක් සිදුකර තිබෙනවා.
එම පැමිණිල්ල සම්බන්ධයෙන් විභාග කිරීම සදහා වෙන්නප්පුව පොලීසියේ නිලධාරියෙකු ඊයේ (05) සවස ඔවුන් පදිංචිව සිටින
උළු කර්මාන්ත ශාලාවේ කම්කරු නිවාසය වෙත පැමිණ ඇති බව සඳහන්.
එහිදී දෙපාර්ශවය කැඳවා අවවාද කිරීමෙන් අනතුරුව දෙදෙනාගේම කට උත්තරයක් ලබා ගැනීමට පොලිස් නිලධාරියා කටයුතු කර තිබෙනවා.
එම අවස්ථාවේ දී අනියම් සැමියා එක් වරම තියුණු ආයුධයකින් කාන්තාවගේ ගෙළ සහ කට කපා දරුණු ලෙස කපා ඇති බවයි පොලිසිය පැවසුවේ.
පසුව සිද්ධියෙන් කලබලයට පත්ව ඇති පොලිස් නිලධාරියා මේ බව තම උසස් නිලධාරීන්ට දැනුම් දීමට කටයුතු කරන අතර වාරයේ සැකකරු තමා හැද සිටි ටී ෂර්ටයෙන් කාන්තාවගේ ගෙළ ආවරණය කර පලා ගොස් ඇති බවයි වාර්තා වන්නේ.
කාන්තාව ද කම්කරු නිවාසයෙන් පිටතට පැමිණ මාර්ගයේ ගමන් කරමින් තිබූ වාහනයක නැඟ ලුණුවිල ප්රාදේශීය රෝහලට ගොස් ඇති අතර, පසුව බරපතළ තත්ත්වයේ පසු වූ කාන්තාව වැඩිදුර ප්රතිකාර සඳහා කොළඹ ජාතික රෝහලට මාරු කර යවා තිබෙනවා.
සිද්ධියෙන් පසු පළාගොස් සැඟව සිටින සැකකරු අත්අඩංගුවට ගැනීම සඳහා වෙන්නප්පුව පොලීසිය විමර්ශන ආරම්භකර ඇති බවයි වාර්තා වුණේ.
