‘ක්ලීන් ශ්‍රී ලංකා’ වැඩසටහන යටතේ ප්‍රදේශ ගණනාවකට හෙරොයින් නමැති මත්ද්‍රව්‍ය බෙදාහැරි ජාවාරම්කරුවන් දෙදෙනකු මත්කුඩු සමග අත් අඩංගුවට ගෙන තිබෙනවා.
අඟුරුවාතොට පොලිසිය පැවසුවේ මෙම මෙහෙයුම ඊයේ (13) පස්වරුවේ අඟුරුවාතොට පොලිස් වසමේ රෙමුන – ගාලමුල්ල මාර්ගයේ හදිසි මාර්ග බාධකයකයේ දී සිදු කෙරුණා.
පොලිස් අණ නොතකා ගමන් කිරීමට උත්සාහ කළ යතුරුපැදියක ගමන් කළ දෙදෙනෙකු මහත් පරිශ්‍රමයක් දරා නවතා පරීක්ෂා කිරීමේ දී ඔවුන් සන්තකයේ තිබී හෙරොයින් මිලිග්‍රෑම් 7350 සමග ජාවාරමෙන් උපයා ගත් බවට සැක කෙරෙන මුදලින් රුපියල් 62,700 ක් සොයා ගත් බවත් වාර්තා වනවා.
යතුරුපැදියේ පසුපස ගමන් කළ සැකකරු සන්තකයේ තිබී හෙරොයින් මිලිග්‍රෑම් 5100ක් සහ මුදල් සොයාගෙන ඇති අතර අනෙක් සැකකරු සන්තකයේ තිබී හෙරොයින් මිලිග්රැම් 2250ක් වෙන් වෙන් වශයෙන් සොයා ගැනුණා.
සැකකරුවන් වයස අවුරුදු 39-40 වියෙහි පසුවන බැල්ලපිටිය හා අඟුරුවාතොට ප්‍රදේශවල පදිංචිකරුවන්.
සැකකරුවන් සන්තකයේ තිබී අත්අඩංගුවට ගත් ජංගම දුරකථන 03ක් පරික්ෂා කිරීමේ දී කලක පටන් හොරණ- අඟුරුවාතොට, බුලත්සිංහල, මොරගහේන, බණ්ඩාරගම, අළුබූමුල්ල ඇතුළු ප්‍රදේශවල හෙරොයින් ජාවාරමේ නිරත පුද්ගලයින් බව අනාවරණය කරගෙන තිබෙනවා.
සැකකරුවන් දෙදෙනා අද (14) හොරණ මහේස්ත්‍රාත් අධිකරණයට ඉදිරිපත් කර, රැඳවුම් නියෝග ලබා ගැනීමට නියමිතයි.
