සුරේන්ද්‍ර වසන්ත හෙවත් ක්ලබ් වසන්ත ඇතුළු තවත් පුද්ගලයෙක් අතුරුගිරිය ප්‍රදේශයේ දී වෙඩි තබා ඝාතනය කිරීමට සම්බන්ධ වෙඩික්කරුවන් රටින් පිටව ගොස් ඇති බවට මෙතෙක් සිදුකරන ලද විමර්ශනවල දී අනාවරණය වී නොමැති බව පොලිසිය පවසනවා.
අද (17) පෙරවරුවේ පැවති මාධ්‍ය හමුවක දී පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූව මේ බව සඳහන් කළා.
මේ අතර මෙම අපරාධයේ ප්‍රධාන සැකකරුවෙක් වන ටැටූ දුලාන් නැමැත්තාගේ මව මත්ද්‍රව්‍ය ජාවාරමේ නියැලුණු තැනැත්තියක් බවට හඳුනගෙන ඇති බවයි මාධ්‍ය ප්‍රකාශකවරයා පැවසුවේ.
එම කාන්තාව මීට පෙර මත්ද්‍රව්‍ය සම්බන්ධ වැරදි සඳහා මීට පෙර අත්අඩංගුවට පත්ව ඇති බවයි අනාවරණය වී ඇත්තේ.
මේ අතර මෙම කලබ් වසන්ත ඝාතනයට මෙරට ප්‍රභූවරයෙක් සම්බන්ධ බවට සමාජ මාධ්‍ය ඇතුළු ඇතැම් වාර්තාවල පළවන කරුණු අනුව එවැනි පුද්ගලක් මේ සඳහා සම්බන්ධ වී ඇති බවට සිදුකළ විමර්ශන අනුව අනාවරණය වී නොමැති බව ද මාධ්‍ය ප්‍රකාශකවරයා සඳහන් කර සිටියා.
