Update :- මෙරට ප්‍රසිද්ධ ව්‍යාපාරික ‘ක්ලබ් වසන්ත’ නොහොත් සුරේන්ද්‍ර වසන්ත ඇතුළු පිරිසට වෙඩි තැබීමට පැමිණි ඝාතකයින් පැමිණි මෝටර් රථය ගැන මේ වනවිට තොරතුරු රැසක් අනාවරණය වෙමින් තිබෙනවා.
අද (08) පස්වරුව වන විට පොලිසිය විසින් ඝාතකයින් පැමිණි සුදු පැහැති මෝටර් රථය ද සොයා ගැනුණා.
ඒ ඔවුන් විසින් අදාළ රථය කඩුවෙල – කොරතොට ප්‍රදේශයේ මහා මාර්ගයේ දමා ගොස් තිබියදියි.
මෙම ඝාතකයින් අපරාධය සිදු කිරීමට මෝටර් රථයකින් පැමිණ පසුව ඉන් ඝාතනය සිදු කර පලා ගොස් කඩුවෙල – කොරතොට ප්‍රදේශයේ දී වෑන් රථයකට මාරු වී පලා ගොස් ඇති බවයි වාර්තා වන්නේ.
එම පලා යන දර්ශන ඇතුළත් සී.සී.ටී.වී පට මේ වනවිට පොලිස් භාරයට ගෙන තිබෙනවා.
අද පෙරවරු 09ට පමණ මෙම ඝාතනය සිදු වූයේ දුලාන් සංජුල නමැති ටැටූ ශිල්පියෙකුට අයත් අතුරුගිරිය ප්‍රදේශයේ නව ටැටූ සාප්පුවක් විවෘත කිරීමට ප්‍රධාන ආරාධිත අමුත්තන් වශයෙන් සුරේන්ද්‍ර වසන්ත සහ ඔහුගේ බිරිඳ එක් ව සිටියදියි.
එහිදී නන්නාඳුනන තුවක්කුකරුවන් දෙදෙනකු පැමිණ එල්ල කළ වෙඩි පහරින් සුරේන්ද්‍ර වසන්ත එම ස්ථානයේ දී ම ජීවිතක්ෂයට පත් වූ අතර බරපතළ තුවාල ලැබූ තවත් අයෙක් කොළඹ ජාතික රෝහලට ඇතුළත් කිරීමේ දී මියගියා.
එම වෙඩි පහරින් සුරේන්ද්‍ර වසන්තගේ බිරිඳට මෙන් ම මෙරට ජනප්‍රිය ගායන ශිල්පිනී කේ. සුජීවාට ද බරපතළ තුවාල සිදු වූ අතර ඔවුන් දෙදෙනා ද තවත් දෙදෙනකු ද කොළඹ ජාතික රෝහලේ සහ හෝමාගම මූලික රෝහලේ දැඩි සත්කාර ඒකකයන්හි ප්‍රතිකාර ලබනවා.
මෙම වෙඩි තැබීමට හේතුව මෙතෙක් අනාවරණය වී නැහැ.
