ශ්‍රී ලංකා ක්‍රීඩකයින්ගේ ගැටළු විසඳීම සඳහා ක්‍රීඩා ඔම්බුඩ්ස්මන්වරයෙකු පත් කිරීමට නව ක්‍රීඩා අමාත්‍ය හරීන් ප්‍රනාන්දු මහතා යෝජනා කර තිබෙනවා.
ක්‍රීඩක ක්‍රීඩිකාවන්ගේ ගැටලු විසඳීම සඳහා ක්‍රීඩා ඔම්බුඩ්ස්මන්වරයා දිනපතා ක්‍රීඩා අමාත්‍යාංශයේ රැඳී සිටින බවයි අද පැවති උත්සවයක් අමතමින් අමාත්‍යවරයා ප්‍රකාශ කළේ.
“සම්මේලන 60කට වැඩි ප්‍රමාණයක දිගින් දිගටම පවතින ගැටලු නිසා අපේ ක්‍රීඩකයන් මුහුණ දෙන ගැටලු විසඳන්න ඇමැතිතුමාට සහ නිලධාරීන්ට ඉඩක් ලැබෙන්නේ නැහැ. ඒ නිසා අපේ ක්‍රීඩක ක්‍රීඩිකාවන්ගේ ප්‍රශ්න ඇසීමට පමණක් ක්‍රීඩා ඔම්බුඩ්ස්මන්වරයෙකු පත් කරනවා,” යනුවෙන් ඔහු සඳහන් කර තිබෙනවා.
තමා මෙහි පැමිණියේ කිසිදු පුද්ගලයෙකු ආරක්ෂා කිරීමට නොවන බවට සහතික වූ ක්‍රීඩා අමාත්‍යවරයා වැඩිදුරටත් කියා සිටියේ තමන්ට විශාල වැඩකොටසක් සහ අවශ්‍ය යම් යම් වෙනස්කම් කිරීමේ වගකීමක් පැවරී ඇති බවයි.
තමන් තනිකරම ක්‍රිකට් අමාත්‍යවරයකු නොවන බව ප්‍රකාශ කළ ඔහු අනෙකුත් සියලුම ක්‍රීඩාවල දියුණුවට කටයුතු කරන බවට ද සහතික වුණා.
ජාත්‍යන්තර ක්‍රිකට් කවුන්සිලය විසින් පනවා ඇති තහනම සම්බන්ධයෙන් අදහස් දැක්වූ අමාත්‍ය ප්‍රනාන්දු මහතා, ශ්‍රී ලංකාවේ ක්‍රිකට් ක්‍රීඩාව නංවාලීම සඳහා ICCය සමඟ සාකච්ඡා කර අවශ්‍ය වෙනස්කම් සිදු කරන බවට ද සහතික වී තිබෙනවා.
ක්‍රිකට් ක්‍රීඩකයින් ගෙන්වා ගන්නේ යම් යම් ප්‍රදේශවලින් පමණක් බවත් ඔවුන් දක්ෂතා සෙවීම අනෙකුත් ක්ෂේත්‍රවලට ද ප්‍රවර්ධනය කළ යුතු බවත් ක්‍රීඩා අමාත්‍යවරයා පෙන්වා දෙනවා.
