එළඹෙන එක්දින ලෝක කුසලාන ක්‍රිකට් තරගාවලියේ වැඩිම අවදානයක් දිනාගෙන ඇති තරගය වන ඉන්දියාව සහ පාකිස්ථානය අතර තරගයේ ප්‍රවේශපත් සියල්ල මේ වනවිට අලෙවි වී අවසන්ව තිබෙනවා.
ලෝක කුසලාන තරගාවලියේ ප්‍රවේශ පත් අලෙවිය ආරම්භ කර දින හතරකට පසු එම තරගයේ ප්‍රවේශපත් සියල්ල අලෙවි වී අවසන් වූ බවයි ඉන්දීය මධ්‍ය වාර්තා කළේ.
කෙසේ වෙතත් අහමදාබාද් හි නරේන්ද්‍ර මෝදි ක්‍රිකට් ක්‍රීඩාංගණයේ දී පැවැත්වීමට සැලසුම්කර ඇති මෙම තරගයේ ප්‍රවේශපත් මේ වනවිට කළු කඩ වෙළඳපොළේ ඉතා අධික මිල ගණන්වලට අලෙවි වන බවයි තොරතරු වාර්තා වන්නේ.
එලෙස අලෙවි වන ප්‍රවේශපත් ඉන්දීය රුපියල් ලක්ෂ 56ක් තරම් ඉහළ අගයකට මිලකර ඇති බවයි දැන්ගන්නට ලැබුණේ.
ඉන්දියාවේ ඇතැම් වෙබ් අඩවි ඔස්සේ මෙම ප්‍රවේශපත් මෙලෙස ඉහළ මිල ගණන්වලට අලෙවියට තබා ඇති ආකාරය ද දැකගත හැකි වනවා.
ලෝක කුසලාන තරගාවලියේ ඉන්දියාව සහ පාකිස්ථානය අතර තරග ඔක්තෝම්බර් මස 14 වනදා පැවැත්වීමට සැලසුම්කර තිබෙනවා.
