වැඩිමහල් පුද්ගලයින් පිරිසක් සමග කළුතර කැලිඩෝ වෙරළ තීරයේ දිය නෑමට පැමිණ පසුව රාත්‍රී කාලය තෙක් තනිව සිටි කුඩා පිරිමි දරුවෙකු කළුතර දකුණ පොලිසිය විසින් සිය භාරයට ගෙන තිබෙනවා.
ඊයේ (17) උදෑසන සිට කළුතර කැලිඩෝ වෙරළ තීරයේ වැඩිමහල් පුද්ගලයින් කිහිපදෙනෙකු සමග දිය නෑමෙන් අනතුරුව සවස එම දරුවා වෙරළ තීරයේ අතරමං කර දමා ගොස් ඇති බවයි හෙළිවී ඇත්තේ.
වයස අවුරුදු 11ක් වන මෙම පිරිමි ළමයා කලුතර දුම්රිය ස්ථානය අසල ත්‍රීවිල් රථ රියදුරන් විසින් දකුණු කළුතර පොලිසියට භාර දී තිබෙනවා.
එම දරුවා දකුණු කළුතර පොලිසියට බාරදුන් ත්‍රී රෝද රථ රියදුරන් ප්‍රකාශ කළේ තමන් මෙම දරුවා පිළිබඳව දිනය පුරාම දැඩි අවධානයෙන් සිටි බවයි.
අඳුර වැටී තිබියදීත් මෙම දරුවා කළුතර කැලිඩෝ වෙරළ තීරයේ තනිව සිටිනු දැක නිරන්තරයෙන් විමසිලිමත් වූ අතර බීමත් පුද්ගලයකු දරුවා රැගෙන යාමට උත්සාහ කළ මොහොතේ ත්‍රී රෝද රථ රියැදුරන් දෙදෙනෙකු ඔහු එම පුද්ගලයා ගෙන් මුදාගෙන දකුණු කළුතර පොලිසියට බාර දී තිබෙනවා.
පසුව පොලිසියේ උපදෙස් මත මෙම දරුවාගේ අනන්‍යතාවය තහවුරු කරගෙන කාන්තා හා ළමා කාර්යංශ නිලධාරීන් සමඟ එම දරුවාගේ දෙමාපියන් වෙත බාරදීමටයි පියවර ගෙන ඇත්තේ.
අතරමං ව සිටි දරුවා කළුතර දකුණ උක්වත්ත ප්‍රදේශයේ පදිංචිකරුවෙක් බවට ද තොරතුරු අනාවරණය වී තිබෙනවා.
