47 වන නිහෝන් සිකි ජාත්‍යන්තර ඉන්දීය කරාටේ ශූරතා තරගාවලියට ශ්‍රී ලංකාව නියෝජනය කරමින් සහභාගී වූ ක්‍රීඩක ක්‍රීඩිකාවන් රන් පදක්කම් 06ක් සහ රිදී පදක්කමක් දිනා ගනිමින් විජයග්‍රාහී ලෙස දිවයිනට අද (31) පැමිණියා.
මෙම තරගාවලිය ඉකුත් 25 වැනි දින සිට 29 වැනි දින තෙක් ලෝකයේ රටවල් 07ක කරාටේ ක්‍රීඩක ක්‍රීඩිකාවන් 200කට අධික පිරිසකගේ සහභාගීත්වයෙන් ඉන්දියාවේ බැංගලෝර් නුවර දී පැවැත්වුණා.
දෙවෙලපොළ ආනන්ද විද්‍යාලයේ ගෞරී ශෂී ප්‍රභා විසින් ‘කාටා සහ කුම්තේ’ යන අංශ ද්විත්වයෙන් ම රන් පදක්කම් දිනා ගෙන තරගාවලියේ විශිෂ්තම ක්‍රීඩිකාව බවට සම්මාන දිනාගත්තා.
හුණුමුල්ල මහා විද්‍යාලයේ අයෝධ්‍ය හිරුෂාන් ද එම දෙඅංශයෙන්ම රන් පදක්කම් 02ක් දිනා ගැනීමට සමත් වූ අතර දෙවෙළපොළ ආනන්ද විද්‍යාලයේ සදෙව් ඉදුවර ක්‍රීඩකයා ද රන් පදක්කමක් හා රිදී පදක්කමක් දිනා ගනු ලැබුවා.
මීට අමතරව මෙම ක්‍රීඩකයින්ගේ පුහුණුකරු ලෙස කටයුතු කරන ෂිහාන් ප්‍රියන්ත පෙරේරා ජ්‍යෙෂ්ඨ අංශය යටතේ තරග කර රන් පදක්කමක් රට වෙනුවෙන් දිනා ගැනීමට සමත් වීම ද කැපී පෙනුණා.
මෙම විශිෂ්ටයින් රැගත් ඉන්දීය ගුවන් සේවයේ ඒ.අයි.- 2131 දරන ගුවන් යානය අද පස්වරු 02.50ට ඉන්දියාවේ බැංග්ලෝර් නුවර සිට මෙරටට පැමිණියා.
