දිනේෂ් චන්දිමාල්ට එංගලන්ත සංචාරයේ දී ඇති වූ පිටකොන්දේ ආබාධය හේතුවෙන් නවසීලන්ත තරගාවලියේ දී කුසල් මෙන්ඩිස් හෝ සධීර සමරවික්‍රම කඩුලු රකින පිතිකරුවෙකු ලෙස යොදාගැනීමට අවස්ථාව පවතින බව ශ්‍රී ලංකා ක්‍රිකට් තේරීම් කමිටු සභාපති උපුල් තරංග පවසනවා.
ඒ, අනුව කුසල් මෙන්ඩිස් ක්‍රීඩා කළහොත් කඩුලු රකින ක්‍රීඩකයා ලෙස අංක 07 ස්ථානයේ පන්දුවට පහර දෙන බවයි තරංග පැවසුවේ.
එළඹෙන නවසීලන්තය සමඟ තරගාවලියේ දී කමිඳු මෙන්ඩිස්ට පිතිකරණ ලැයිස්තුවේ උසස්වීමක් හිමිවන බව සඳහන් කළ තරංග, අංක තුන ස්ථානය හිමිවන්නේ කුමන ක්‍රීඩකයාට ද යන්න සඳහන් කර නැහැ.
මේ අතර දකුණු අප්‍රිකා A කණ්ඩායමට එරෙහිව දැක්වූ විශිෂ්ට දස්කම් හේතුවෙන් ඕෂද ප්‍රනාන්දු ද නවසීලන්ත තරගාවලියේ දී ශ්‍රී ලංකා කණ්ඩායමට එක්කර ගැනීමේ සූදානමක් ඇති බව වාර්තා වනවා.
සංචාරක නවසීලන්ත කණ්ඩයම සහ ශ්‍රී ලංකාව අතර තරග දෙකකින් සමන්විත ටෙස්ට් තරගාවලිය ලබන 18 වනදා ගාල්ලේ දී ආරම්භවීමට නියමිතයි.
