කමින්ස් වෙනුවට එන ස්මිත්

එළඹෙන ජනවාරි මස අග සතියේ ශ්‍රී ලංකාවේ ටෙස්ට් තරග සංචාරයකට එක් වීමට නියමිත ඔස්ට්‍රෙලියානු කණ්ඩායමේ නායකත්වයේ යම් වෙනසක් සිදු කිරීමට තීරණය කර තිබෙනවා.

විදෙස් ක්‍රීඩා මාධ්‍ය වාර්තා කරන පරිදි වත්මන් ඔස්ට්‍රෙලියානු ටෙස්ට් කණ්ඩායමේ නිත්‍ය නායක පැට් කමින්ස් වෙනුවට ස්ටීවන් ස්මිත් කටයුතු කරනු ඇති බවයි.

ඊට හේතුව වන්නේ පැට් කමින්ස් සිය දෙවැනි දරුවාගේ උපත වෙනුවෙන් ඒ සඳහා නිවෙස බලා යාමයි.

කෙසේවෙතත් පැට් කමින්ස් හට මෙම තරගාවලියේ පළමු ටෙස්ට් තරගය පමණක් අහිමි විය හැකි බවත් වාර්තා වනවා.

පැට් කමින්ස් මේ වනවිට (02) සිය මව්බිමේ පැවැත්වෙන බෝඩර් ගවස්කාර් කුසලානය සඳහා ද එක් ව සිටිනවා.

මීට පෙර ද ඔස්ට්‍රෙලියානු කණ්ඩායමේ නිත්‍ය නායකයා ලෙස ස්ටීවන් ස්මිත් කටයුතු කළා.

ජාත්‍යන්තර ටෙස්ට් තරග 113කට ක්‍රීඩා කර ඇති ස්මිත් ටෙස්ට් ශතක 34ක් සහ අර්ධ ශතක 41ක් ලබා ගැනීමට සමත් ව තිබෙනවා.

ස්මිත් වර්ෂ 2014 සිට 2023 තෙක් ටෙස්ට් නායකත්වය ගෙන කටයුතු කළ අතර ඔහුගේ නායකත්වය යටතේ ටෙස්ට් තරග 38කින් තරග 21ක් ඔස්ට්‍රෙලියාව ජයගෙන තිබෙනවා.

තරග 10ක් පමණක් පරාද වී ඇති අතර තවත් තරග 06ක් ජය පරාජ‍යෙන් තොරව අවසන් වුණා.