හැටන් – සමර්හිල් වතුයායේ දී මරණයට පත් කඳුකර කොටියාගේ, මරණය සිදු වූ ආකාරය සැළකිල්ලට ගනිමින් ඒ සම්බන්ධව වහාම විමර්ශණයක් සිදුකරන ලෙස කෘෂිකර්ම, වනජීවී හා වනසම්පත් සංරක්ෂණ අමාත්ය මහින්ද අමරවීර අමාත්යාංශ ලේකම්වරියට උපදෙස් ලබා දී ඇති බව වාර්තා වනවා.
දඩයක්කරුවෙකු ඇටවූ මන්දකට හසුවී සිටි මෙම කඳුකර කොටියා අසල තිබූ ගසකට නැඟ සිටියදී මන්ද එම සත්වයාගේ ඉණ ප්රදේශයෙන් තද වී තිබෙනවා.
කෙසේ වෙතත් ගස උඩ සිරව සිටි සත්වයා ගසෙන් බිමට ගැනීමට වනජීවි නිලධාරින් විවිධ උත්සාහයන් ගත්ත ද ඒවා සාර්ථක වී නැහැ.
ඒ, අනුව අවසානයේ වනජීවි නිලධාරින් ගස කපා බිම හෙළමින් සත්වයා බිමට ගැනීමටයි අවසානයේ කටයුතු කළේ.
කෙසේ වෙතත් ගස කපා බිම හෙළිමත් සමඟ ඊට යට වී එම සත්වයා මියගොස් ඇති බවයි වාර්තා වුණේ.
මේ සම්බන්ධව වහාම විමර්ශනයක් කරන කරන ලෙසත්, අදාල නිලධාරින්ගේ නොසැලකිලිමත්කම හේතුවෙන් එම සත්වයා මරණයට පත් වූ බව සනාථ වන්නේ නම් එම වනජීවි නිලධාරීන් සම්බන්ධව විනයානුකූල පියවර ගන්නා ලෙසත් අමාත්යවරයා ලේකම්වරියට උපදෙස් දී තිබෙනවා.
සිද්ධිය සම්බන්ධව විශේෂ විමර්ශනයක් සඳහා අද (08) දිනම අතිරේක ලේකම්වරයෙකුගෙන් සමන්විත පිරිසක් හැටන් – සමර්හිල් වතුයාය බලා පිටත් කර හැරීමටයි කටයුතුකර ඇත්තේ.
