කඳාන, නාගොඩ ප්‍රදේශයේ දී ඊයේ (20) රාත්‍රියේ දෙපිරිසක් අතර ඇති වූ ආරවුලක් දුරදිග යාමෙන් තියුණු ආයුධවලින් සිදුකළ පහරදීමකින් පුද්ගලයින් දෙදෙනෙක් බරපතල තුවාල ලබා රාගම රෝහලට ඇතුළත් කර තිබෙනවා.
එලෙස රෝහල් ගත කළ දෙදෙනාගෙන් එක් පුද්ගලයෙක් මියගොස් ඇති බවයි පොලිසිය සඳහන් කළේ.
මියගිය පුද්ගලයා වයස අවුරුදු 31ක අයෙක් වන අතර, තුවාලකරු වයස අවුරුදු 29ක තැනැත්තෙක්.
ඔවුන් දෙදෙනාම කඳාන, නාගොඩ ප්‍රදේශයේ පදිංචිකරුවන් බවයි පොලිසිය සඳහන් කළේ.
මරණකරු හා තුවාලකරු දෙපාර්ශවයේ පුද්ගලයන් වන අතර, පුද්ගලික ආරවුලක් හේතුවෙන් ඔවුන් දෙදෙනා අතර සිදුවූ පිහි ඇනුම්වලින් මෙලෙස එක් පුද්ගලයෙකු මියගොස් අනෙක් පුද්ගලයා තුවාල ලබා ඇති බවට දැනට සිදුකරන ලද විමර්ශන වලදී අනාවරණය වී ඇත්තේ.
මිය ගිය පුද්ගලයාගේ මෘත ශරීරය රාගම රෝහලේ මෘත ශරීරාගාරයේ තැන්පත් කර ඇති අතර, කඳාන පොලිසිය වැඩිදුර විමර්ශන සිදුකරනු ලබනවා.
