මේ වසරේ පැවැත්වෙන අයි.සී.සී. ලෝක ටෙස්ට් ශූරතා අවසන් මහා තරගයේ ස්ථානය වෙන්කරගත් පළමු කණ්ඩායම බවට පත්වීමට ඕස්ට්‍රේලියානු කණ්ඩායමට අද (03) හැකියාව ලැබුණා.
ඒ, ඉන්දියාව සමඟ ඉන්දෝර් හිදී පැවති තුන්වන ටෙස්ට් තරගයෙන් කඩුලු 09ක ජයක් වාර්තා කිරීමට හැකිවීමත් සමඟයි.
මෙම ලෝක ටෙස්ට් ශූරතාව තුළ (2021-2023) ඕස්ට්‍රේලියාව සහභාගී වූ ටෙස්ට් තරඟ 18න් තරග 11ක් ජයගෙන තිබෙනවා.
ලෝක ටෙස්ට් ශූරතාවලියේ ප්‍රසාද ලකුණු සටහනේ ඉන්දියාව තවමත් දෙවන තැන පසුවන අතර, තුන්වන ස්ථානය හිමිව ඇත්තේ ශ්‍රී ලංකාවටයි.
ඒ, අනුව ඕස්ට්‍රේලියාව සමඟ ලෝක ටෙස්ට් ශූරතා අවසන් මහා තරගයේ දී තරග වදින අනෙක් කණ්ඩායම බවට පත්වීමට ශ්‍රී ලංකාව සහ ඉන්දියාව අතර තියුණු සටනක් මේ වනවිට නිර්මාණය වී තිබෙනවා.
ඉන්දියාව සහ ඕස්ට්‍රේලියාව අතර තරග 04කින් සමන්විත ටෙස්ට් තරගාවලිය මේ වන විට තරග දෙකට එකක් ලෙස ඉන්දියාව පෙරමුණ ගෙන ඇති අතර, පළමු තරග දෙක ඉන්දියාව ජය ගත්තා.
දෙරට අතර පැවති තුන්වන තරගය ඕස්ට්‍රේලියාව අද ජය ගත්තේ තරගය අවසන්වීමට තවත් දින දෙක හමාරක පමණ කාලයක් ඉතිරිව තිබිය දීයි.
