පොළොන්නරුව, බකමූණ ප්රදේශයේ සුසාන භූමියක සොහොන් කොත් මත බලි පූජා කරමින් සිටි කාන්තාවන් දෙදෙනෙක්
සම්බන්ධයෙන් ප්රදේශවාසින් විසින් බකමූණ පොලිසියට පැමිණිලි කර තිබෙනවා.
ඔවුන් විසින් සුසාන භූමියක ඊයේ (21) දහවල් කාලයේ සොහොන් කොත් මත මැටිවලින් සෑදූ මිනිස් රූපවලට සමාන රූප යොදාගනිමින් පහන් පත්තු කරමින් සිට ඇති අතර, ඒ පිළිබඳව ගම්වාසීන් මෙලෙස පොලීසිය දැනුම්වත් කර ඇති බවයි වාර්තා වන්නේ.
එම දැනුවත් කිරීම මත පැමිණි බකමූණ පොලීසියෙන් නිලධාරීන් සිදුකළ පරීක්ෂා කිරීම්වල දී දැකගැනීමට හැකිව ඇත්තේ,
මෙම කාන්තාවන් දෙදෙනා විසින් සොහොන් කොත්වලට හානි කරමින් මිනී වළවල් ද හාරා ඇති ආකාරයයි.
මෙහිදී බලි පූජාවට යොදාගත් උපකරණ ද පොලීසිය විසින් සිය භාරයට ගෙන තිබෙනවා.
මෙහිදී කාන්තවන් දෙදෙනා ද පොලිස් භාරයට ගෙන ඇති අතර, එහිදී ඔවුන්ව හෙට (21) දිනයේ බකමූණ මහේස්ත්රාත් අධිකරණය හමුවේ පෙනී සිටින බවට දන්වමින් මුදා හැරීමටයි පොලිසිය කටයුතු කර ඇත්තේ.
මෙම කාන්තාවන් දෙදෙනාගෙන් එක් අයෙක් හිඟුරක්ගොඩ ප්රදේශයේ පදිංචි වයස අවුරුදු 49ක තැනැත්තියක් වන අතර, සැකකාර අනෙක් කාන්තාව බකමූණ, සරුබිම ප්රදේශයේ පදිංචි වයස අවුරුදු 38ක තැනැත්තියක්.
පුද්ගලික හා පොදු සුසාන භූමි අඥා පනත යටතේ සොහොන් කොතකට හානි සිදුකිරීම යන වරද යටතේ බකමූණ පොලීසිය විසින් හෙට (22) අධිකරණයට කරුණු දැක්වීමට නියමිතව තිබෙනවා.
