රුහුණු මහා කතරගම දේවාලයට බැතිමතුන්ගෙන් ලද පුද පඬුරු මගින් මහරගම අපේක්ෂා රෝහලේ ඉදිකළ නව ළමා වාට්ටු සංකීර්ණය විවෘත කිරීම අද දින (03) පෙරවරුවේ යෙදී තිබූ සුබ මොහොතින් විවෘත කෙරුණා.
ගුවන් හමුදාපති එයා මාර්ෂල් උදේනි රාජපක්ෂ මහතා නියෝජනය කරමින් එහි උසස් නිලධාරීන් පිරිසක් ද, සෞඛ්‍ය අමාත්‍යාංශයේ ලේකම් වෛද්‍ය පාලිත මහීපාල, අපේක්ෂා රෝහලේ අධ්‍යක්ෂ වෛද්‍ය අරුණ ජයසේකර,රුහුණු මහා කතරගම දේවාලයේ බස්නායක නිලමේතුමන් ඩිශාන් ගුනසේකර ඇතුළු ගුවන් හමුදාවේ සහ අපේක්ෂා රෝහලේ නිලධාරීන් මීට එක් ව සිටියා.
මාස දහයක කාලයකින් මෙහි ඉදිකිරීම් නිම කර ඇති අතර ශ්‍රී ලංකා ගුවන් හමුදාවේ ”හුස්ම ව්‍යාපෘතිය” යටතේ රණවිරුවන්ගේ ශ්‍රම දායකත්වයෙන් මෙය ඉදිකිරීම ද විශේෂත්වයක්.
මෙම වාට්ටු සංකීර්ණය සඳහා වියදම් වී ඇති මුදල දළ වශයෙන් රුපියල් මිලියන 160ක් බවයි පැවසෙන්නේ.
තවත් මිලියන පනහක මුදලක් මෙහි ගෘහ භාණ්ඩ ඇතුළු උපකරණ සඳහා වියදම් වී ඇති බව ද වාර්තා වනවා.
ශ්‍රී ලංකාවේ පිළිකා රෝගයෙන් පීඩා විඳින්නා වූ ළමා රෝගීන් සඳහා ප්‍රතිකාර ලැබිය හැකි ලෙස අංග සම්පූර්ණව මහල් 4කින් සමන්විතව ඉදිකර ඇති මෙම වාට්ටු සංකීර්ණයේ නේවාසික ප්‍රතිකාර ලබා ගත හැකි රෝගී ළමුන් ගණන 70ක්.
මේ කරගත්තු පින කොච්චරක්ද කියලා කියන්න වචන නැහැ